ევროპა ცნობილია უძველესი და ბრწყინვალე საშობაო ბაზრობებით, რომლებიც გაჟღენთილია ცხელი გლინტვეინის და დარიჩინის ორცხობილების სურნელით. ისტორიული არქიტექტურა ბაზრობებს განსაკუთრებულ ხიბლს სძენს – საახალწლო განათებებითა და სიმღერებით. საშობაო ბაზრობა ყველა ევროპულ ქალაქშია, თუმცა ჩვენ განსაკუთრებული ვარიანტები შეგიგროვეთ:
კოპენჰაგენის საშობაო ბაზრობები
დანიის დედაქალაქს რამდენიმე გამორჩეული საშობაო ბაზრობა აქვს. ქალაქის შუაგულში, მთავარ მოედანზე Julemarked ეწყობა, 180 ათასი საშობაო განათებით, ნივთების და საჭმელ-სასმლის დახლებით. ოჯახებს მთელი დღის გატარება შეუძლიათ ტივოლის ბაღების სიახლოვეს, გასართობ პარკში. ბაზრობები ნოემბრის შუა რიცხვებიდან იხსნებიან და იანვრის პირველ პერიოდამდე გასტანენ.
ზაგრების საშობაო ბაზრობა
ხორვატიის დედაქალაქი საშობაოდ განსაკუთრებული ყურადღების ქვეშ ექცევა. გასულ წელს, საშობაო ბაზრობის წყალობით მან ევროპის საუკეთესო სადღესასწაულო მიმართულების წოდება მოიპოვა. ნოემბრის შუა რიცხვებიდან იანვრის პირველ კვირამდე აქ ყველაფერი მორთული და გადანათებულია. აქ ბევრი საინტერესო ღონისძიება დაგხვდებათ.
ტალინის საშობაო ბაზრობა
ესტონეთის დედაქალაქი, შუასაუკუნოვანი ძველი ქალაქით, იუნესკოს დაცულ ტერიტორიათა სიაშია. საშობაო ბაზრობა აქ ნოემბრის ბოლო პერიოდიდან დეკემბრის ბოლომდე იხსნება. ყოველწლიურად ის ნახევარ მილიონ ტურისტს მასპინძლობს. ბავშვებს შეუძლიათ სანტას თავის კაბინაში ეწვიონ და კარუსელებზე ისიამოვნონ.
ბრიუგეს საშობაო ბაზრობა
უძველესი ქალაქი ბრიუგე შობის ყოველ სეზონზე ჯადოსნური და მაგიურია. მთავარი მოედანი, Grote Markt, სადღესასწაულო ცენტრია. ისეირნეთ ქალაქის ვიწრო ქუჩებზე, სადაც ხელნაკეთ ნივთებს, გლინტვეინს, ბელგიურ ლუდს და შოკოლადებს აღმოაჩენთ. რომანტიკული აქტივობისთვის, გაიარეთ არხებთან და ისრიალეთ სიყვარულის ტბაში.
ზალცბურგის საშობაო ბაზრობა
ავსტრიის გამორჩეული ქალაქი, სადაც მოცარტი დაიბადა, მიუნხენიდან და ვენიდან ერთ დღიანი ტურითაც გასიამოვნებთ. დეკემბერში აქ უზარმაზარი, უძველესი საშობაო ბაზრობა – Christkindlmarkt ეწყობა, ზალცბურგის კათედრალთან. შეიძინეთ ხელნაკეთი ნივთები, ხის ფიგურები, ზამთრის აქსესუარები, გემრიელი საკვები და სუვენირები. მეორე ბაზრობაა – Hohensalzburg Fortress, სადაც ფუნიკულიორით მოხვდებით და ქალაქზე ხდებით დატკბებით.
სტრასბურგის საშობაო ბაზრობა
როდესაც ვფიქრობთ შობაზე საფრანგეთში, პირველ რიგში პარიზი გვახსენდება; მაგრამ, ამ ქვეყნის უძველესი და ყველაზე ცნობილი საშობაო ბაზრობა სტრასბურგში ტარდება. სადღესასწაულოდ, ქალაქის ისტორიულ ცენტრში, 300 ხის დახლი იდგმება, ქუჩები ირთვება და განათებები ყენდება.
ბერლინის საშობაო ბაზრობები
ბერლინში 80-მდე საშობაო ბაზრობა ეწყობა და ისინი თითქმის ყოველ ფეხის ნაბიჯზე შეგხვდებიან. ყველაზე პოპულარულია – Weihnachtszauber am Gendarmenmarkt, რომელიც მთავარი ღირსშესანიშნაობებიდან ახლოსაა. აქ რეგულარული ლაივ-შესრულებებიც იმართება. ალექსანდრეპლაცის სიახლოვეს კი მორთული ეშმაკის ბორბალიც მიგანიშნებთ საოცარი ბაზრობის გზას.
პრაღის საშობაო ბაზრობები
ქალაქის ორი მთავარი ბაზრობა ძველი ქალაქის შუაგულში და ვენსლას მოედანზე იმართება. აქ საჭმელ-სასმელის დიდი არჩევანი, უზარმაზარი ნაძვის ხეები და სადღესასწაულოდ მორთული გოთიკური არქიტექტურა დაგხვდებათ.
ვენის საშობაო ბაზრობა
ნოემბრიდან იანვრამდე, ვენა ზამთრის საოცრებათა ქვეყნად იქცევა. აქ ყოველ წელს შთამბეჭდავი, ეკო-მეგობრული საშობაო განათებებია. უდიდესი ბაზრობა ვენის ელეგანტური მერიის წინ ეწყობა – Rathausplatz-ზე და ყოველწლიურად მილიონობით ვიზიტორს იზიდავს. დაათვალიერეთ მრავალფეროვანი დახლები საახალწლო მუსიკის თანხლებით და შეუერთდით გართობას.
