გრეგი და ქეზი უკვე 20 წელია გზას ადგანან, მათ 50-ზე მეტი ქვეყანა მოინახულეს და ხუთ მათგანში ცხოვრებაც მოასწრეს. ყველაფერი სოლო მოგზაურობით დაიწყო, შემდეგ წყვილის მოგზაურობაში და ბოლოს კი ოჯახურ გასართობში გადაიზარდა. წყვილს მართლაც ბევრი რჩევა დაუგროვდა და ისინი შეეცადნენ, რომ მათგან საუკეთესოები გაეზიარებინათ.
1. მოგზაურობა – მთავარი პრიორიტეტი
თუკი გსურთ რომ ბევრი იმოგზაუროთ, მაშინ ეს ცხოვრების მთავარ მიზნად უნდა აქციოთ. ძვირფასი ნივთები, ტანსაცმელი, ფეხსაცმელი, მანქანები თუ სახლები – ყველაფერი უკანა პლანზე უნდა გადავიდეს და მთავარი რესურსი სწორედ ოცნებების ახდენას უნდა მოხმარდეს.
2. გაატარე მეტი დრო ნაკლებ ადგილას
მოგზაურობის დაგეგმვისას ნუ შეეცდებით რაც შეიძლება მეტი ადგილის რაც შეიძლება ნაკლებ დროში მონახულებას. 6 ქვეყანა 6 კვირაში? უმჯობესია თუკი ერთ კონკრეტულ რეგიონს აიღებთ და მას უკეთ შეისწავლით. ჩაბარგება-ამობარგება, იაფი ფრენების ძებნა, განსხვავებული დროის სარტყელი, ვალუტა და ხშირად ვიზის საკითხი – სიამოვნების მიღებაში ხელს აუცილებლად შეგიშლით.
3. ნუ ელი, რომ ყველაფერი ისე იქნება, როგორც სახლში
თუკი გინდათ, რომ თავს ისე გრძნობდეთ, როგორც საკუთარ სახლში, მაშინ სხვაგან რატომ მიდიხართ? მოგზაურობა ახალი გამოცდილების მისაღებად, ახალი რაღაცეების გასასინჯად და ახალი კულტურის შესაცნობადაა განკუთვნილი. ახალი გამოცდილება კი შესაძლოა ზოგჯერ შოკისმომგვრელიც კი იყოს, რაც მოგზაურობას კიდევ უფრო მეტ ხიბლს ძენს.
4. მოგზაურობას ბავშვები ხელს არ უშლიან
ოჯახთან ერთად მოგზაურობა შეუძლებელი არ არის და პირიქით ეს ნამდვილად დაუვიწყარი გამოცდილებაა. მართალია, პატარებთან ერთად „ბოდიალს“ თავისი მინუსებიც აქვს, თუმცა ეს ამად ნამდვილად ღირს. ბავშვები ცხოვრების სტილს უკეთესობისკენ ცვლიან.
