ავტორი: თამარ ჭანკვეტაძე
Sheniemigranti.ge გთავაზობთ ექსკლუზიურ ინტერვიუს თამი სეთურიძესთან, რომელიც სციალურ ქსელში ცნობილია, როგორც შენი გიდი ბარსელონაში, იგი ტურისტებს სთავაზობს გიდის მომსახურებას, როგორც ინდივიდუალურად ასევე ჯგუფებისთვის.
–თამი, როდის გადაწყვიტეთ ქვეყნის დატოვება და რა იყო ამის მიზეზი?
– 2016 წელს მე და ჩემმა მეუღლემ საქორწინო მოგზაურობაში გადავწყვიტეთ წამოსვლა, ერთ თვიანი ვიზა გვქონდა და ვაპირებდით სხვადასხვა ქალაქების მონახულებას, როცა მარშრუტს ვგეგმავდით საერთოდ სხვა მიმართულება გვქონდა არჩეული, თუმცა საბედნიეროდ ტურისტულმა კომპანიამ გვირჩია ესპანეთი და ასე აღმოვჩნდით საოცრებათა ქალაქში. ჩამოსვლისთანავე ისე აღვფრთოვანდით ბარსელონით, ხალხით, სითბოთი და სიყვარულით, რომელიც ტრიალებდა გარშემო, რომ სამუდამოდ გადავწყვიტეთ აქ დარჩენა. ვთქვით, რომ გვეცადა ცხოვრების დაწყება ახლიდან, ნულიდან…
–რთულია თქვენთვის სამშობლოდან შორს ცხოვრება?
-საბედნიეროდ, ისეთი საქმე დავიწყე, რომ ყოველდღიურად მიწევს ქართველ ტურისტებთან ურთიერთობა, განწყობა და ხასიათი, რომლითაც ისინი ჩამოდიან მახსენებს ჩვენი ქვეყნის საუკეთესო მხარეს, რის გამოც მიყვარს საქართველო. რა თქმა უნდა, ოჯახის წევრების და მეგობრების მონატრება რთულია, მაგრამ დასაქმებული ადამიანი ყოველდღიურ ურთიერთობას და ფიზიკურად ყველას მონახულებას ისედაც ვერ ახერხებს ვერც სამშობლოში, ამიტომ ტელეფონით კონტაქტი ავსებს შეძლებისდაგვარად ამ დანაკლისს.
–რა სირთულეები ახლავს უცხო ქვეყანაში თავის დამკვიდრებას?
-პირველ ეტაპზე მთავარი სირთულეა ენა, ოფიციალურად მუშაობის და ცხოვრების უფლების მოპოვების პროცედურები, რომლებიც დროში იწელება, თუმცა პარალელურად გეძლევა საშუალება ისწავლო, განვითარდე, უამრავი ორგანიზაციაა რომელიც ინტეგრაციაში გეხმარება. ბევრად მარტივი იქნებოდა სახელმწიფოს დონეზე რომ იყოს მოგვარებული ჩვენი დიპლომების და მართვის მოწმობების აღიარება (ლეგალიზაცია), რაც პროფესიულად დასაქმების და განვითარების საშუალებას მოგვცემდა. თუმცა მონდომებულ და მშრომელ ადამიანს მაინც ყველაფერი გამოსდის.
– გქონიათ მომენტი, როდესაც აპირებდით ხელის ჩაქნევას, დანებებას და საქართველოში დაბრუნებას?
-საქართველოში დაბრუნება ძალიან კარგი იქნებოდა, ძალიან მიყვარს ჩემი სამშობლო და ვისურვებდი იგივე საქმე, იგივე პერსპექტივა იქ დამენახა. სამწუხაოდ, ამ ეტაპზე ვერ ვხედავ ამ შესაძლებლობას, ამიტომ ჩემი გეგმები და მიზნები ბარსელობას უკავშირდება.
–გვიამბეთ თქვენი ყველაზე რთული ისტორია, რაც ემიგრაციაში ყოფნის დროს გახსენდებათ
-ზოგდად ვთვლი რომ ძლიერი ადამიანი ვარ, მიყვარს რისკი და არ მაშინებს სიძნელეები, ცხოვრებისეულ სირთულეებსაც მარტივად ვუყურებ, ყოველთვის კარგის მოლოდინი მაქვს. ნებისმიერ საქმეს რასაც ვაკეთებ ვცდილობ შევიყვარო და მერე ძალიან მარტივდება ყველაფერი. ყოველთვის ასე ვიყავი და ეს მიდგომა ამართლებს ჩემს შემთხვევაში. სანამ ჩემს საქმეს დავიწყებდი, რა თქმა უნდა, მეც ვიმუშავე დამლაგებლად, ბებიასთან შვილიშვილად, დილის საათებში მარტო რომ არ ყოფილიყო მივდიოდი და მასთან ვატარებდი დროს, ამ საქმეებს იმდენი პლიუსი ქონდა არასდროს მიფიქრია რომ ეს გაუსაძლისი ან რთული იყო. დალაგებაზე დროის მენეჯმენტი, ხსნარების დანიშნულება და კარგი დალაგება ვისწვლე.
ბებიასთან მუშაობისას აქაური ოჯახი შევიძინე, ვისწავლე ენა, ადგილობრივი ტრადიციები, რომლებიც შემდეგ ჩემს საქმეში გამომადგა. ნებისმიერი შრომა დასაფასებელი სწორედ ამიტომ არის, რომ თუ რთული საქმე გადავლახე დიდი გამოცდილებაც შევიძინე, უკეთესი გავხდი და ამაში განვითარების შესაძლებლობაც დავინახე. რთული რომ არ ყოფილიყო საინტერესოც არ იქნებოდა.
–რა გენატრებათ სამშობლოში ყველაზე მეტად?
– ოჯახი და მეგობრები, ყველაზე მეტად მენატრება მათთან გატარებული დრო. დედაჩემის მომზადებული გემრიელობები…
–გვიამბეთ თქვენს საქმიანობაზე, საინტერესო ცხოვრება გაქვთ ბარსელონაში?
-როგორც გითხარით დარჩენა სპონტანური გადაწყვეტილება იყო, ქალაქი ერთი ნახვით შეგვიყვარდა მე და ჩემს მეუღლეს, თავისუფალ დროს მის დათვალიერება-აღმოჩენაში ვატარებდით. დავდიოდით უცნობ ქუჩებში, სხვა ქალაქებიც ბევრი მოვინახულეთ, ყველა ქართველი სტუმრის და მეგობრის მასპინძელი ვიყავით და აქედან გაჩნდა იდეა გავმხდარიყავი ყველას გიდი საოცრებათა ქალაქში. ჩემმა ოჯახის წევრებმა იციან როგორი აღფრთოვანებული ვარ ქალაქით, ამაზე ხუმრობენ კიდეც რომ ყველაფერი უპირობოდ მომწონს ბარსელონაში. სწორედ ამ შთაბეჭდილებების და სიყვარულის გაზიარებას ვცდილობ ადამიანებისთვის, ის რის გამოც შემიყვარდა უზომოდ ეს ქალაქი, მინდა რომ ჩემი თვალით დავანახო თითოეულ სტუმარს და მეც ყოველი ტურისტი მიახლებს იმ შეგრძნებებს, რომლებიც მე დამეუფლა ქალაქში პირველად ჩემოსვლისას. ამიტომ არასდროს მბეზრდება ერთიდაიგივე ისტორიების ყოველდღიურად მოყოლა, უცნობი და საინტერესო ამბების მათთვის გაზიარება, განსაკუთრებით მიყვარს როცა ქალაქში რამდენჯერმე ნამყოფ ადამიანს ისეთ ადგილებს ვანახებ რომელიც 2-3 ვიზიტისას ვერ ნახეს. ქალაქზე ინფორმაციის მოპოვების,მისი ისტორიის სწავლის და უცნობი საინტერესო ადგილების ძებნის შემდეგ უფრო და უფრო ვრწმუნდები, რომ ჩემთვის იდეალურ საქმეს ვაკეთებ. საქმე, რომელიც უსაზღვროდ მომწონს, მიყვარს და მაბედნიერებს.
– დაგვიხასიათეთ ბარსელონა…
-ბარსელონა არის ყველაზე ფერადი, მხიარული და სიცოცხლით სავსე ქალაქი, სადაც ადამიანებს ძალიან ცოტა ყოფნით ბედნიერებისთვის, აქვთ ბევრი დღესასწაული და მიზეზი დროის მხიარულად გასატარებად. უცნობი ადამიანების მოსალმება და ღიმილი დღეს მიცვლის და მითბობს. ეს ქალაქი ჩემთვის კომფორტთან და სტაბილურობასთან ასოცირდება.
–გვირჩიეთ ადგილები, რომლებიც პირველ რიგში უნდა მოვინახულოთ ბარსელონაში სტუმრობისას
-რა თქმა უნდა, ქალაქის ისტორიული ნაწილის მონახულებას ვურჩევ ყველა ტურისტს, რათა კარგად გაითავისოს საიდან დაიწყო ქალაქმა არსებობა, როგორ განვითარდა და დღეს რა ეტაპამდე მიაღწია. ასევე, გაუდის შემოქმედების გარეშე წარმოუდგენელია ბარსელონა. ეს არის მთავარი რის სანახავადაც მილიონობით ადამიანი ჩამოდის ბარსელონაში. ამ აუცილებლად სანახავი და პოპულარული ადგილების გარდა არის ძალიან ბევრი უცნობი, უნიკალური და მნიშვნელოვანი ადგილები, რასაც დამოუკიდებლად ვერ ნახულობენ ტურისტები. ამიტომ პირველი რჩევა კარგი მეგზურის პოვნაა, ქალაქზე შეყვარებული ადამიანი დაუვიწყრად აქცევს თქვენს მოგზაურობას. თანაც, მნიშვნელოვანია სწორად გაწერილი გეგმა, რაც საშუალებას მოგცემთ მაქსიმალურად ბევრი რამ ნახოთ ქალაქში და ქალაქთან ახლოს. ბევრი დეტალია გასათვალისწინებელი, ქალაქში ტურისტული მახეები და დამაბნეველი სერვისებია, რაც ხშირად გაკარგინებთ დროს, ფულს და ნერვებს, ეს კი გასათვალისწინებელია.
–თამი, სხვა რომელ ქალაში გიმოგზაურიათ და რომელ ქალაქს ან ქვეყანას მოუხდენია თქვენზე დიდი შთაბეჭდილება?
-ბარსელონაში ჩამოსვლის შემდეგ ესპანეთის სხვადასხვა ქალაქები ვნახეთ მე და ჩემმა მეუღლემ, საფრანგეთის სამხრეთი, ნიცა, კანი, ვიყავით მონაკოშიც, ბევრი ქალაქი მომეწონა, მაგრამ მსგავსი შთაბეჭდილება, რაც ბარსელონამ მოახდინა ჩემზე არცერთს მოუხდენია. როცა სხვაგან ვრჩებით ბარსელონა ძალიან მენატრება. ამ ქალაქს აქვს საოცარი მიზიდულობა, რომელიც ბევრ ჩემს ტურისტსაც უჩნდება, ბრუნდებიან ისევ და ისევ, რამდენიმე სამუდამოდ საცხოვრებლადაც გადმოვიდა.
–ინტერვიუს ბოლოს, გიტოვეთ თავისუფალ სივრცეს. შეგიძლიათ, რაც გსურთ ის თქვათ…
-ბევრი რამის თქმა მინდა ადამიანებისთვის, შეიძლება ბანალურად ჟღერდეს, მაგრამ პირველ რიგში, ყველამ უნდა გაიაზროს, რომ ყველაფერი შესაძლებელია და ჩვენზეა დამოკიდებული. არასდროს დაკარგონ მოტივაცია და ყველანაირად ეცადონ მიზნის მიღწევას. წინასწარ არ ინერვიულონ ჯერ არ მომხდარ ცუდზე, კარგის მოლოდინს მართლა კარგი ამბები მოაქვს… მე სულ ასეთი ვიყავი – ოპტიმისტი, მხიარული, მიზანდასახული.
#drpkhakadze #gochadze #sheniemigranti
მასალის გამოყენების პირობები
