ავტორი: თათია გოჩაძე
sheniemigranti.ge გთავაზობთ ექსკლუზიურ ინტერვიუს სოციალურ ქსელში ცნობილი ბლოგის My Tiny World შემქმნელთან… მარია (მერი) ჭიჭიაშვილი-სიყმაშვილი 25 წელია, ესპანეთში ცხოვრობს და ხელოვნების საოცარ მინიატურულ ნამუშევრებს ქმნის, რომლის რეალობისგან გარჩევა გაგიჭირდებათ…
– გვიამბეთ თქვენი ემიგრანტული ისტორია – როდის და რატომ გადაწყვიტეთ ესპანეთში საცხოვრებლად წასვლა?
– თითქმის 25 წელია, წამოსული ვარ საქართველოდან. ყოველთვის მომწონდა ესპანური კულტურა, ენა და გადავწყვიტე, წავსულიყავი ესპანეთში… ჩამოვედი სასწავლო პროგრამით და აქამდე შემოვრჩი. შევქმენი ოჯახი და მყავს ერთი შვილი.
– გვიამბეთ თქვენი შემოქმედების შესახებ… საოცარ მინიატურებს ქმნით – რომელ ტექნიკას იყენებთ, თიხით მუშაობთ? ასევე გვიამბეთ, როდის გაგიჩნდათ ამ საოცრებების კეთების იდეა?
– მინიატურების შექმნა 4 წლის წინ დავიწყე, მანამდე ვიყავი დაინტერესებული ფოტოგრაფიით და კულინარიით, კულინარიის მხრივ საკმაოდ კარგი წარმატებები მქონდა… იმ მომენტისათვის ვმუშაობდი ინგლისის ტოპ 20-ში შესულ მიშლენის ვარსკვლავის მფლობელ ერთ ერთ რესტორანში და “ჰოლიდეი ინის” მთავარ კონდიტერად. მაგრამ დედის უეცარმა გარდაცვალებამ რადიკალურად შეცვალა ჩემი ცხოვრება. ყველაფრის დატოვება მომიწია. დიდი დეპრესიის შემდეგ, რაც ჩემთვისც უეცარი მოვლენა იყო, დავიწყე მინიატურების კეთება. ვერასოდეს ვიფიქრებდი, რომ ასეთი პატარა, მილიმეტრიანი ნივთების კეთება დამამშვიდებდა.
ეს ყველაფერი რომ მეკეთებინა, იმდენად მინდოდა, რომ მეგონა, თვალებს თუ დავხუჭავდი, თითები თავისით იმუშავებდნენ. ზოგჯერ ისე ვერთვებოდი მუშაობის პროცესში, რომ ჭამაც მავიწყდებოდა, დილის 7 საათიდან ზოგჯერ ღამის 11-12 სათამდეც ვმუშაობდი, სულ მინდოდა რაღაც მეკეთებინა… ამას ისიც დაემატა, რომ რასაც ვაზიარებდი ჩემს სოც ქსელში, მეგობრები არ დუტოვებია გულგრილი. მოჰყვა ბევრი მოწონება, გაზიარება, საოცრად თბილი სიტყვები და გულის ამაჩუყებელი წერილები, რაც იმჟამინდელ მდგომარეობაში ჩემთვის დიდი დახმარება და გვერდში დგომა იყო. მადლობა მათ ამისთვის!
თავიდან, როგორც კონდიტერს, სახლში სხვა მასალა არც მქონდა და დავიწყე ცომითა და შაქრის მასით გაკეთება მინიატირების. შემდეგ გადავედი სინთეთიკურ თიხაზე, ამ მომენტისათვის ჩემს პატარა სახელოსნოში ნახავთ თითქმის ყველანაირ მასალას – გააჩნია, რა მინდა გავაკეთო და როგორი ეფექტი მინდა, მივიღო. მანამდე მინიატურებთან არანაირი შეხება არ მქონია, მამა მხატვარი მოქანდაკე მყავს და მაინც, როგორც ამბობენ გენში გადადისო.
მამა სხვადასხვა ავტორთან მუშაობდა… მთავარი ჩამომსხმელი იყო და საქართველოში უმრავლესობა ძეგლების მის მიერ არის შესრულებული… მაგალითად: ბერიკაობა, ქართლის დედა, დავით სარაჯიშვილი, ეგნატე ნინოშვილი, ელენე ახვლედიანი, ვაჟა ფშაველა… აკაკი, ილია… ქუთაისში დავით აღმაშენებელი, ფოთში ცოტნე დადიანი.. უამრავი სხვა კიდევ..
მოკლედ, მამა უზაარმაზარ მეტალის ქანდაკებებს აკეთებს საქართველოში თუ მის ფარგლებს გარეთ… დედას კი უგემრიელესი კერძების მომზადება შეეძლო და კულინარიული ნიჭიც მისი მხრიდან გამომყვა.
– როგორია ესპანეთში ცხოვრება – რა პლუსები და მინუსები აქვს ამ ქვეყანას?
– იდეალური ქვეყანა, ალბათ, არ არსებობს. ბევრ ქვეყანაში მიცხოვრია, ვყოფილვარ და ყველას აქვს თავის დადებითი და უარყოფითი მხარეები. ახლანდელი სიტუაცია ესპანეთში ცოტა რთულია. რთულია სამსახურის შოვნა, მაგრამ ინგლისში ეს პრობლემა არ არის… თავად ბევრი ესპანელი ტოვებს ქვეყანას და მიდის სხვაგან საცხოვრებლად. ინგლისშიც უამრავი ესპანელია, რომელებიც იქ მუშაობენ.
– ჩვენი მედიაჰოლდინგის მთავარი ხაზი საზოგადოებრივი ჯანდაცვის თემატიკაა, ამიტომ საინტერესოა, რა მდგომარეობაა ჯანდაცვის სისტემის მხრივ ესპანეთში?
– ესპანეთში ჯანდაცვის სისტემა ერთ-ერთი საუკეთესოა ევროპის ქვეყნებს შორის. როგორც აქაური მოქალაქეებისთვის, ისე ემიგრანტებისთვის ხდება 100% დაფინანსება ჯანდაცვის სამინისტროდან. მედიკამენტებს კი 86%… მაგრამ უკვე პირად კონსულტაციას რაც შეეხება, ვფიქრობ, გამართლებაზეა – ვინ შეგხვდება და სპეციალისტთან ვიზიტს კი საკმაოდ დიდი დრო სჭირდება.
– რას ურჩევთ იმ ადამიანებს, ვისაც ესპანეთში ჩამოსვლა აქვთ გადაწყვეტილი – რა უნდა გააკეთონ მარტივად ადაპტირებისთვის?
– ჩემი რჩევა იქნება, რომ პირველ რიგში ენა შეისწავლონ. რთულია, როცა არაფერი გესმის და ვერაფერს ვერ უხსნი. პირველად რომ ჩამოვედი , ინგლისურად ვესაუბრებოდი და მიუხედავად ამისა, ძალიან გამიჭირდა, სანამ ესპანური არ შევისწავლე.
– მარია, გიტოვებთ თავისუფალ სივრცეს იმისთვის, რომ მიმართოთ ჩვენს მკითხველს ან უბრალოდ, სათქმელი თქვათ…
– მინდა ვისარგებლო თქვენი გვერდით და მადლობა გადავუხადო მამას, ჩემს ძმასა და მის ოჯახს, ყველა ჩემს მეგობარს, ვინც გვერდში მიდგას.
ასევე მინდა, ვუთხრა თქვენს მკითხველს რომ აკეთონ გულით ის, რაც უყვართ, რაც სულიერ სიმშვიდეს მოუტანთ.. ყოველთვის გამოიღებს შედეგს…
#drpkhakadze #gochadze #sheniemigranti
მასალის გამოყენების პირობები
