ალბათ, მსოფლიოში ყველაზე უცნაური ტრადიციებით ბერძნები იწყებენ დიდმარხვას. რატომ? –
საუკუნოვანი ტრადიციების ჩამონათვალით, რომელსაც დღეს გთავაზობთ, თავად განსაჯეთ.
“სუფთა ორშაბათი ” – დღე პირველი როდესაც ბერძენი მართლმადიდებლები (და არა მარტო) სულის განწმედის მიზნით მარხვას იწყებენ.
ამ დღეს, მთელი საბერძნეთის მასშტაბით, მაღლობი ადგილებიდან იწყება ფრანის გაშვება-გაფრენა.
ეს ტრადიცია გვიანდელი ჩვეულებაა, მაგრამ დღემდე ყველაზე პოპულარულია. ფრანის ფრენა განასახიერებს ადამიანის სულის ფრენას ზეცისა და ღმერთისკენ.
ითვლება, რომ რაც უფრო მაღლა დაფრინავს, მით უფრო სავარაუდოა, რომ ღმერთი შეისმენს და აღასრულებს ჩვენს ლოცვა-ვედრებას.
სხვადასხვა რეგიონში კი ამ დღეს გამართული დღესასწაულები ნამდვილად სასწაული სანახაობაა.
ცეკვა “ღაიტანაკი” ამ დღეს ლამის სახალხო მსვლელობად იქცევა ხოლმე და იმდენად ამაღელვებელია, რომ გულგრილს არავის ტოვებს, წრეში ჩამდგარი, ფერად ლენტებზე ჩაჭიდებული დიდ-პატარა ტრადიციულ ჰანგებზე საათობით ცეკვავს და ყველას “ფერხულში” ჩაბმას სთავაზობს.
კუნძულ კერკირას ზოგიერთ სოფელში, დღემდე ტრადიციად შემორჩა “მღვდლების ცეკვა“, რომელსაც შემდეგ სოფლის უფროსი თაობა აგრძელებს.
ამ დღეს კარპათაში ლამის ნამდვილი
ღვთის სამსჯავრო იმართება, თეატრალური დეტალებით და რა თქმა უნდა, ბოლოს დროსტარებითა და ცეკვით სრულდება.
მაგრამ დღეს ერთ ყველაზე უცნაურ ტრადიციაზე უფრო მსურს საუბარი.
ქ. გალაქსიდში დღემდე აქტუალურია “ფერადი ფქვილით ბრძოლა”, რომელსაც ბერძნები სხვანაირად ფქვილით გათხუპვნას უწოდებენ და მართლა საოცარ სანახაობად აქცევს იქაურობას.
ეს არის ზეიმი, რომელიც ფოკიდას რეგიონში ეწყობა და სრულიად ეწინააღმდეგება სუფთა ორშაბათის სახელის ლიტერატურულ განზომილებას.
ამ დღისთვის ქალაქში წინასწარ ხდება ფქვილის უდიდესი მარაგის მობილიზება.
ადგილობრივები, ძველი ტანსაცმლით, შარფებითა და ნიღბებით გამოდიან ქუჩებში, ფერადი ფქვილით სავსე ტომრებით და “ფერადი ომიც” იწყება მუსიკის, ალკოჰოლისა და ცეკვის თანხლებით.
ვისაც მსვლელობაში მონაწილეობა არ სურს, შუბლზე ფეხსაცმლის საცხით ჯვარს გამოისახავს.
დღესასწაული გრძელდება მანამ სანამ მთელი ქალაქი ფერადი ფქვილით სრულიად დაიფარება.
ზეიმი გრძელდება გვიან გამთენიამდე და კორინთოს წყლებში ბანაობით, ეგრეთ წოდებული “განწმენდით” სრულდება.
წყარო: ქართულ-ბერძნული, კულტურულ-საგანმანათლებლო ცენტრი “პეგასი-მერანი”.
#პეგასიმერანი
#drpkhakadze
#gochadze
#sheniemigranti
