Sheniemigranti.ge გთავაზობთ ინტერვიუს ესპანეთში მცხოვრებ გიორგი ქართველთან რომლის ბლოგიც “გიორგი ქართველის ბლოგი” სოციალურ ქსელში პოპულარულია.
გიორგისთან ერთად საზოგადოებამ მისი ესპანელი მეორე ნახევარი ალბაც შეიყვარა. წყვილი პოზიტიური ვიდეოებით ნამდვილად ანებივრებს ერთგულ აუდიტორიას.
– გიორგი, დიდი ხანია, თვალს ვადევნებ თქვენს საოცარ წყვილს. ბოლოს თქვენი ვიდეო ვნახე, სადაც ამბობთ, რომ გკითხეს – რატომ აირჩიეთ ესპანელი ცოლი და შემდეგ იყო ალბას გასაოცარი ვიდეო, სადაც ქართულ ტრადიციებს ასე კარგად იცნობს და პატივს სცემს…
გვიამბეთ, როგორ დაიწყო თქვენი ემიგრანტული ისტორია და როგორ გაიცანით ალბა?
-12 წლიდან ესპანეთში ვცხოვრობ, ამ ასაკში წამომიყვანა აქ დედაჩემმა. ფაქტობრივად, ცხოვრების ნახევარზე მეტი აქ მაქვს გატარებული. ალბა 10 წლის წინ სასწავლებელში გავიცანი და ამის შემდეგ დაიწყო ჩვენი ურთიერთობა.
– როგორც ჩანს, მას ძალიან უყვარს საქართველო, ხშირად სტუმრობთ კიდეც სამშობლოს. საინტერესოა, იცოდა რაიმე ჩვენი ქვეყნის შესახებ, თუ თქვენ გააცანით ჩვენი კულტურა?
-ჩვენი ქვეყნის შესახებ იცოდა, რადგან ამ ქვეყანაში ძალიან ბევრი ქართველი ცხოვრობს. აქედან გამომდინარე, საქართველოს, როგორც ქვეყნის შესახებ, გაგებული ჰქონდა, მაგრამ შიდა სამზარეულო, კულტურა და ტრადიციები ჩემთან ყოფნის შემდეგ გაიცნო.
– მისგან დასაფასებელია ჩვენი ქვეყნის ტრადიციებისადმი ასეთი პატივისცემა და საჯაროდ ვუხდი მადლობას მას, რომ ასე შეიყვარა საქართველო.
თქვენი ვიდეოებიდანაც ჩანს, რომ ყველაზე მეტად ხინკალი უყვარს. ჩვენი ტრადიციებიდან რა არის მისთვის ყველაზე მისაღები და რა – არა?
– იმდენად არც იცნობს, რომ რაიმე მიუღებელი ყოფილიყო მისთვის, იქიდან გამომდინარე, რომ საქართველოში არ გაზრდილა. ყველაფერი დადებითად მიიღო და შეიყვარა. სოფლად გრძნობს თავს ყველაზე კარგად, შინაურობაში და ოჯახურ სიტუაციაში, როცა ვართ ბებოსთან ერთად, განსაკუთრებით.
– გიორგი, ფაქტობრივად, ესპანეთში გაიზარდეთ, საინტერესოა, გიფიქრიათ საქართველოში დაბრუნებაზე?
– რა თქმა უნდა, ვფიქრობ. თუმცა, რთულად გადასადგმელი ნაბიჯია გარკვეული პირობებიდან გამომდინარე, თუნდაც იმიტომ, რომ აქ ვარ გაზრდილი. დარწმუნებული ვარ, ისეთ რაღაცას შევქმნი, რომ თუ სრულად ვერა, წლის გარკვეული ნაწილი მაინც გავატარო საქართველოში. ზოგადად, მინდა, რომ მეც და ალბამაც წლის გარკვეული ნაწილი გავატაროთ საქართველოში და ნაწილი – აქ.
– გიორგი, კახელი ხართ ხომ?
– დედით კახელი ვარ. მამით კი იმერელი, თუმცა კახეთთან უფრო მეტი შეხება მაქვს, ვიდრე იმერეთთან.
-თქვენს ერთ-ერთ ვიდეოში ვნახე, რომ ყურძნის მიმართ გაქვთ განსაკუთრებული დამოკიდებულება და ამიტომ გკითხეთ… როგორც ვიცი, თქვენს ბიძას მოჰყავს ესპანეთში ყურძენი, მოგვიყევით ვრცლად ამის შესახებ…
-დიახ, ეს საკითხი ემიგრანტებისთვის საინტერესო იქნება – ესპანეთში, სადაც ვცხოვრობთ, არნედო, შეიძლება ითქვას, პატარა კახეთია. როგორც საქართველოშია კახეთი ყურძნით სახელგანთქმული, ასევეა ესპანეთში ლა-რიოხა. ზოგადად, რიოხის ღვინო ცნობილია მსოფლიოს მასშტაბით.
ჩემს ქალაქში ბევრი ქართველი ცხოვრობს და გამომდინარე აქედან, ბოლო წლებია შეიქმნა ისეთი სიტუაცია, რომ ბევრ ქართველს ამ ქვეყნის მთავრობამ გამოუყო დაუმუშავებელი მიწები, რომლებიც გამოუყენებელი იყო. არიან ქართველები, რომლებიც ამუშავებენ მიწას, ხილ-ბოსტნეულს და ა.შ. ბიძაჩემის შემთხვევაში იყო ადამიანი, რომელსაც გამოუყენებელი სახლი ჰქონდა და ათხოვა. წარმოიდგინეთ, რა შეგრძნებაა, როდესაც თავისი ხელით მოყვანილი ხილ-ბოსტანი აქვთ ესპანეთში ქართველებს.
– საინტერესოა. ამ სტატიით ესპანეთში მცხოვრებ ადამიანებს შეუძლიათ გაიგონ ამ შესაძლებლობის შესახებ…
– დიახ… ზოგადად, ჩემი ვიდეოების მთავარი მიზანი, რასაც ემიგრაციაზე ვიღებ ხოლმე, არის ის, რომ დაინახონ ჩვენი კუთხე განსხვავებული თვალით.
– გიორგი, ჩვენი მედიაჰოლდინგის მთავარი თემატიკა საზოგადოებრივი ჯანდაცვაა, ამიტომ გვიამბეთ, როგორია ჯანდაცვის სისტემა ესპანეთში? თუ გქონიათ რაიმე შეხება და როგორ შეაფასებდით ამ ყველაფერს.
– ესპანეთის ჯანდაცვის სისტემაში, ფაქტობრივად, ყველაფერი არის უფასო, გარდა კბილის მკურნალობისა. უბრალოდ, ყველა ადამიანს, რომელიც მუშაობს, ხელფასიდან ეჭრება გარკვეული თანხა, რომელიც საერთო ჯანდაცვის სისტემაში მიდის და ამით სარგებლობს ყველა. დადებითად ვაფასებ, რადგან ყოველთვის გაქვს იმედი, რომ როგორც არ უნდა გაგიჭირდეს, არ შეგეშინდება, რომ არ გაქვს დაზღვევა…
– არის თუ არა საინტერესო ესპანეთში ცხოვრება ემიგრანტისთვის?
-რა თქმა უნდა, შეუძლებელი არაფერია და ნებისმიერ ადამიანს შეუძლია ამ ეპოქაში და დროში გზა გაიკვალოს ნებისმიერ ადგილას, სადაც არ უნდა იყოს, მაგრამ ახალი ჩამოსული ადამიანისთვის ახლა გაცილებით უფრო რთულია, ვიდრე ადრე. საინტერესო იმდენად არის, რამდენადაც ახლოს არიან ჩვენთან, ქართველებთან, ტემპერამენტით.
– ენის ბერიერი რამდენად არის პრობლემა? ინგლისური ენა თუ გამოადგებათ ქართველ ემიგრანტებს?
-ინგლისური დიდად არა. ნაციონალური ენა ესპანურია. კატალონიასა და ბასკეთში ოფიციალური ენა ესპანურია, თუმცა საჯარო სამსახურებში გჭირდება კატალონიური და ბასკური ენა. მაგრამ მთელს ტერიტორიაზე ნაციონალური ენა ესპანურია.
– ესე იგი, ვინც ჩამოსვლას აპირებს ესპანეთში, უმჯობესია იცოდეს ესპანური ენა და არ დაეყრდნოს მხოლოდ ინგლისურს არა?
-დიახ, მაგრამ ესპანური პრაქტიკაში მარტივად ასათვისებელი ენაა. თუ ჩავუღრმავდებით გრამატიკულად, საკმაოდ რთულია, ბრუნვები და ა.შ. წლებია უკვე აქ ვარ და ბოლომდე ათვისება მეც ვერ შევძელი, მაგრამ პრაქტიკულ გამოცდილებაში მარტივად შეძლებთ სალაპარაკო ესპანურის შესწავლას.
ავტორი: თათია გოჩაძე
