მედიაჰოლდინგი „შენი“ გთავაზობთ ინტერვიუთა ციკლს საქართველოს ახალგაზრდა ელჩებთან, რადგანაც მიგვაჩნია, რომ ფართო საზოგადოებამ უნდა გაიცნოს ყველა ის ადამიანი, რომელიც ჩვენი ქვეყნის პოპულარიზაციისთვის სახელმწიფოებრივად სასარგელო საქმეს აკეთებს.
ჩვენი რესპონდენტი ესპანეთში საქართველოს ახალგაზრდა ელჩი დეა მაღალაშვილია და სანამ მასთან საინტერესო ინტერვიუს შემოგთავაზობთ, გაგაცნობთ მოკლე ინფორმაციას ახალგაზრდა ელჩების შესახებ:
ცნობისთვის: საქართველოს საგარეო საქმეთა სამინისტრო, მიგრაციის პოლიტიკის განვითარების საერთაშორისო ცენტრის (ICMPD) მხარდაჭერით, საგრანტო პროგრამას 2018 წლიდან ახორციელებს. პროგრამის მიზანს წარმოადგენს საქართველოს პოპულარიზაცია, ქვეყნის ეროვნული ინტერესების დაცვისკენ მიმართული ქმედებებისა და ღონისძიებების განხორციელება, მათ შორის, საქართველოს ევროპული და ევროატლანტიკური ინტეგრაციის, აგრეთვე დეოკუპაციისა და კონფლიქტის მშვიდობიანი მოგვარების საკითხებზე საერთაშორისო თანამეგობრობის ინფორმირებულობის გაზრდისა და საკითხის საერთაშორისო დღის წესრიგში გააქტიურების ხელშეწყობის თვალსაზრისით, საქართველოს უცხოელ ახალგაზრდა მეგობართა ქსელის შექმნა, ქართული დიასპორის წარმომადგენლებთან ურთიერთობა და კულტურულ-საგანმანათლებლო ღონისძიებების გამართვა.
პროგრამის ფარგლებში, ახალგაზრდა ელჩების შერჩევა ხდება ღია კონკურსის საფუძველზე, საგარეო საქმეთა სამინისტროს მიერ განსაზღვრული 27 ქვეყნიდან: ავსტრიის რესპუბლიკა, კანადა, ამერიკის შეერთებული შტატები, ბელგიის სამეფო, ბულგარეთი, გერმანიის ფედერაციული რესპუბლიკა, დანია, დიდი ბრიტანეთისა და ჩრდილოეთ ირლანდიის გაერთიანებული სამეფო, ესპანეთის სამეფო, ესტონეთი, თურქეთის რესპუბლიკა იაპონია, ირლანდია, ისრაელის სახელმწიფო, იტალიის რესპუბლიკა, ლატვია, ლიეტუვა, ნიდერლანდების სამეფო, პოლონეთის რესპუბლიკა, საბერძნეთის რესპუბლიკა, საფრანგეთის რესპუბლიკა, უკრაინა, უნგრეთი, შვედეთის სამეფო, შვეიცარია, ჩინეთი, ჩეხეთი.
sheniemigrani.ge გთავაზობთ ექსკლუზიურ ინტერვიუს ესპანეთში საქართველოს ახალგაზრდა ელჩთან – დეა მაღალაშვილთან:
_ როგორც ვიწყებ ხოლმე გაცნობას ზოგადად, ისე გაგაცნობთ ჩემს თავს – Hey, it’s Dea from Georgia – Sakartvelo. გამარჯობა, მე ვარ დეა მაღალაშვილი საერთაშორისო ურთიერთობების სპეციალისტი და ლექტორი. დავასრულე ბაკალავრი საერთაშორისო ურთიერთობების (ევროპა და ახლო აღმოსავლეთის სპეციალიზაცია) მიმართულებით, ხოლო მაგისტრატურა პოლიტიკურ მეცნიერებებში (საერთაშორისო ურთიერთობების სპეციალიზაცია). 2014 წელს დავასრულე „საქართველოს განათლების, მეცნიერების, კულტურისა და სპორტის სამინისტროს“ ლიდერთა სკოლა, სადაც ლექციებს ატარებდა გია მაისაშვილი. ჩემი ძირითადი ინტერესებია მშვიდობის კვლევა; კონფლიქტები და მოლაპარაკებები; თანამედროვე ტექნოლოგიების ინტეგრირება აკადემიურ და სამეცნიერო საქმიანობაში. თუმცა, ჯერ კიდევ ვეძებ კვლევის ინტერესისის სფეროს, რომელსაც დავუკავშირებ დოქტურანტურას.
_ საინტერესოა, როგორია თქვენი ემიგრანტული ისტორია და გზა ესპანეთში საქართველოს ახალგაზრდა ელჩამდე?
_ ჩემი ისტორია პირდაპირ კავშირში ფრაზასთან, რომელსაც ხშირად ვამბობ – „თუ ოცნებობ, ესე იგი, შეგიძლია რეალობად აქციო“. ჩემი ისტორია და გამოცდილებები სწორედ ასე დაიწყო. ძირითადად, ყველა ის სფერო, სადაც დავსაქმდი იწყებოდა პრაქტიკით. 2018-2021 წლებში ვიყავი საქართველოს პარლამენტის მოწვეული სპეციალისტი მანამდე კი პრაქტიკანტი. ბულგარეთის რესპუბლიკის ელჩის აღმასრულებელი თანაშემწე სანამ გავხდებოდი, გავიარე პრაქტიკა საელჩოში. ეს პრაქტიკა კი ბულგარეთის რესპუბლიკის საელჩოს მიერ გამოცხადებულ ესსეების კონკურსში გამარჯვების შედეგი იყო. 2020-2022 წლებში ვატარებდი ახალგაზრდა ევროპელი ელჩის სტატუსს და ამავე მანდატის ფარგლებში 2022 წელს ვიმყოფებოდი ევროპის საბჭოში, სადაც სიტყვით გამოვედი.
საქართველოს სახელით მხარი დავუჭირე, ამავდროულად, მშვიდობის დამკვიდრება ვუსურვე უკრაინას და უკრაინელ ხალხს.
_ თქვენ თქვით, რომ ლექტორიც ხართ – გვიამბეთ ამის შესახებ…
_ კოვიდპანდემიის დროს, 6 სექტმბერს, ჩემს დაბადების დღეზე, გავიარე გასაუბრება და გადავდგი პირველი ნაბიჯი აკადემიურ სფეროში – დავიწყე პრაქტიკა „ილიას სახელმწიფო უნივერსიტეტში“, შემდეგ კი გავაგრძელე საქმიანობა მოწვეული ლექტორის სტატუსით. 2021 წლიდან „ილიას სახელმწიფო უნივერსიტეტის“ აკადემიური წერის ცენტრში „ბიზნესის, ტექნოლოგიისა და განათლების ფაკულტეტის“ ბაკალავრიატის სტუდენტებს ვასწავლი საგანს – „აკადემიური მუშაობის ტექნიკები ინგლისურ და ქართულ ენაზე“.
_ ახლა კი მთავარი კითხვა – როგორ გახდით საქართველოს ახალგაზრდა ელჩი ესპანეთში?
_ 2024 წელს გავხდი კონკურსის „იყავი შენი ქვეყნის ახალგაზრდა ელჩი“ გამარჯვებული ესპანეთის სამეფოში. პროექტს საქართველოს საგარეო საქმეთა სამინისტრო, „მიგრაციის პოლიტიკის განვითარების საერთაშორისო ცენტრის“ (ICMPD) მხარდაჭერით, საგრანტო პროგრამით 2018 წლიდან ახორციელებს. აქვე, მსურს წარმატებები ვუსურვო ჩემს კოლეგებს, ახალგაზრდა ელჩებს 14-მდე ქვეყანაში.
_ რატომ ესპანეთი..?
_ ჩემი მეუღლე წარმატებული კალათბურთელია და თამშობდა ესპანეთში. სწორედ ამ პერიოდიდან დაიწყო ჩემი სიყვარული „სერვანტესის ქვეყნის“ მიმართ. ასე დაემთხვა, რომ ვცხოვრობდით „Alcalá de Henares“-ში, რომელიც სერვანტესის დაბადების ქალაქია. ესპანეთში ჩასვლისთანავე შემიყვარდა ქვეყანა, კულტურა, ისტორია და ადამიანები, რის შემდეგაც ადგილობრივი ვითარების გაცნობა დავიწყე. ჩემი პირადი გამოცდილებიდან გამომდინარე, რადგან აკადემიურ სფეროში ვარ და ვკითხულობ ლექციებს „ილიას სახელმწიფო უნივერსიტეტში“, პირველი შეხება მქონდა „Alcalá De Henares“ და „ფრანკლინის უნივერსიტეტთან“, რამაც შემდგომში ჩემი საკომუნიკაციო სივრცის ნელ-ნელა გაფართოებას შეუწყო ხელი.
ესპანეთში ყოფნის პერიოდში ჩემმა კოლეგამ, სოფიკო ბზარაშვილმა, გამიზიარა და მოტივაცია მომცა, მიმეღო მონაწილეობა ახალგაზრდა ელჩის კონკურსში. ეს საინტერესო გამოცდილება აღმოჩნდა ჩემთვის. წლების წინ, როდესაც ამ პროექტის შესახებ გავიგე, ვიფიქრე, როდესაც ევროპაში წავალ სასწავლებლად, აუცილებლად შევავსებ აპლიკაციის ფორმას-მეთქი… მაშინ ნამდვილად არ მიფიქრია, რომ ასე დალაგდებოდა პროცესები და აღმოვჩნებოდი ესპანეთში.
მნიშვნელოვანია აღინიშნოს, რომ ესპანეთის საელჩო არ არის თბილისში, რაც ქმნის გარკვეულ გამოწვევებს, რომლებიც პირადად გამოვცადე, და ვფიქრობ, რომ ამ სირთულეებს ბევრი ახალგაზრდა, ვინც სასწავლებლად ან საცხოვრებლად მიდის ესპანეთში, აწყდება. ეს მდგომარეობა კიდევ უფრო მეტად მოითხოვს აქტიურ და თანმიმდევრულ მუშაობას, რათა გავაუმჯობესოთ ჩვენი ქვეყნების კავშირები და ხელი შევუწყოთ კულტურული, საგანმანათლებლო და ეკონომიკური თანამშრომლობის განვითარებას.
ესპანეთში ყოფნის პერიოდში ყველაზე ძნელი ჩემი მშობლებისა და პატარა ძმის, გოგლიკოს მონატრება იყო.
ალბათ, ეს გრძნობა ყველასთვის ნაცნობია, როცა შორიდან გენატრება მშობლიური სახლი და საყვარელი ადამიანები.
_ რას იტყვით ემიგრანტების შესაძლებლობებსა და მათ საჭიროებებზე?
_ ემიგრანტები და ზოგადად, დიასპორა ქმნიან ძლიერ საერთაშორისო კავშირებს, რომლებიც მომავალში ქვეყნისთვის მნიშვნელოვანი აქტივი ხდება. ისინი ასევე ჩართულნი არიან საქართველოსთან დაკავშირებულ საგანმანათლებლო, ეკონომიკურ და კულტურულ პროექტებში, რაც მათ ნამდვილ „ხიდების მშენებლებად“ აქცევს საქართველოსა და დანარჩენ მსოფლიოს შორის. ისინი არა მხოლოდ ინარჩუნებენ თავიანთ კულტურულ მემკვიდრეობას, არამედ აქტიურად ახდენენ მის პოპულარიზაციას ადგილობრივ საზოგადოებებში.
მათ შორის სპორტსმენები განსაკუთრებულ როლს ასრულებენ, რადგან მათ წარმატებებს მსოფლიოს მასშტაბით საქართველოს დროშის ქვეშ აცნობენ. სპორტული მიღწევები, იქნება ეს ფეხბურთი, კალათბურთი, თუ სხვა მიმართულება, ასევე, ოლიმპიური, პარალიმპიური ჩემპიონები და ა.შ… ქართველი სპორტსმენები წარმოაჩენენ საქართველოს, რაც აძლიერებს ქვეყნის ცნობადობას და საერთაშორისო ურთიერთობებს. მათ მიღწევებს ემიგრანტები და დიასპორა სიამაყით იზიარებენ და ამით კიდევ უფრო ამყარებენ კავშირს საკუთარ სამშობლოსთან.
პირადი გამოცდილებით მაქვს ნანახი, რაოდენ ბედნიერებაა, როდესაც ჩვენი ქვეყნის ბიჭების და გოგონების თამაშს საერთო სივრციდან უყურებ. ეს არის მომენტი, როდესაც ადამიანები ერთიანდებიან, მხარს უჭერენ თავიანთ ქვეყანას და ერთობლივად განიცდიან გამარჯვებებსა თუ გამოწვევებს. ამგვარი მომენტები კიდევ უფრო ამყარებს კავშირს სამშობლოსთან რაც მათ ნამდვილ ელჩებად აქცევს მსოფლიოს ნებისმიერ კუთხეში.
_ დიახ, გეთანხმებით!… დეა, როგორია თქვენი სამომავლო გეგმები?
_ ჩემი პროფესია პირდაპირ კავშირშია დიპლომატიასთან. ეს ის სფეროა, რომელშიც ჩემს მომავალს ვხედავ. მიყვარს ადამიანები, კომუნიკაცია და ერთიანობა. ჩემი მიზანია, რომ საქართველო და მისი მოსახლეობა მაქსიმალურად კარგად წარმოჩინდეს მსოფლიოს წინაშე.
ესპანეთი ჩემთვის გამორჩეული ქვეყანაა თავისი კულტურით, ისტორიითა და ხალხით. მჯერა, რომ საქართველოსა და ესპანეთს შორის ურთიერთობების კიდევ უფრო გაძლიერება დიდი შესაძლებლობების კარს ხსნის. როგორც „საქართველოს ახალგაზრდა ელჩს ესპანეთის სამეფოში“, მსურს, შევუწყო ხელი ჩვენი ქვეყნების კავშირების გაძლიერებას კულტურული და საგანმანათლებლო მიმართულებებით.
მჯერა, რომ ესპანელ ხალხთან კიდევ უფრო ღრმა ურთიერთობების ჩამოყალიბება და საქართველოს მრავალფეროვანი კულტურისა და ისტორიის გაცნობა ხელს შეუწყობს ჩვენი ეროვნული ინტერესების გაძლიერებას. ჩემი მიზანია, რომ ესპანეთში მცხოვრებ ქართველ ემიგრანტებთან და დიასპორასთან ერთად ვიმუშავო და მათთან ერთად წვლილი შევიტანო საქართველოს წარმოჩენასა და მისი პოზიციის გაძლიერებაში ევროპაში.
_ რა აქტივობებს გეგმავთ თქვენი მანდატიდან გამომდინარე ესპანეთში?
_ ესპანეთში მაქვს დაგეგმილი აქტივობები… მართალია, ყველაფერზე ახლა ვერ ვისაუბრებ, რადგან დადასტურების პროცესშია, მაგრამ შემიძლია ერთ-ერთი საკითხით „დაგასპოილეროთ“, რომელიც ეხება ქართული წიგნების გადაცემას ესპანეთის უნივერსიტეტის ბიბლიოთეკებისთვის და ქართული კუთხის შექმნას. ამავე უნივერსიტეტში განთავსებდა ერთ-ერთი ქართული კომპანიის მიერ დამზადებული წიგნაკი, სადაც ყოველწლიურად ქართველი კურსდამთავრებული სტუდენტები მოაწერენ ხელს და გაუზიარებენ სურვილებს მომავალ სტუდენტებს.
ახლა კი ამ ქართულ კუთხესთან დაკავშირებით მსურს თქვენი პლატფორმის დახმარებით გავაზიარო ინფორმაცია:
ვეძებ ქართულ გამომცემლობებს, რომლებიც გააზიარებენ ქართულ ლიტერატურას და ენობრივ წიგნებს – აღნიშნული განთავსდება უნივესიტეტების ბიბლიოთეკებში და კატალონიის ნაციონალურ ბიბლიოთეკაში.
ასევე, ვეძებ ქართული პროდუქტის/ბრენდის მწარმოებლებს, მხატვრებს, მწერლებს, მუსიკოსებსა და სხვა შემოქმედებს, რომლებსაც სურთ, რომ მათი ნამუშევრები წარდგენილი იყოს ესპანეთში. ჩემი ვიზიტის ფარგლებში მაქვს დაგეგმილი რამდენიმე პროექტი, შეხვედრა და ღონისძიება, სადაც დიდი სიამოვნებით წარმოვადგენდი პროდუქტებს, ნამუშევრებს და სხვა მასალებს, რათა ქართული კულტურა და ბიზნესები საერთაშორისო ასპარეზზე წარდგეს. მზად ვარ, გავაგრძელო კომუნიკაცია და ერთად გავაცნოთ ესპანეთს ჩვენი ქვეყანა! ინფორმაციისთვის გაეცანით გვერდს – https://www.facebook.com/GYASpain
ავტორი: თათია გოჩაძე
მასალის გამოყენების პირობები
