ევროკავშირის საელჩო საქართველოში ევროკავშირში მოგზაურობის ახალი სისტემის ETIAS-ის ამოქმედების შესახებ ინფორმაციას ავრცელებს.
“მნიშვნელოვანი განახლება ევროკავშირის არაწევრი ქვეყნების მოქალაქეებისთვის, ვინც ევროპის 29 ქვეყანაში მოკლე ვადით იმოგზაურებს. 2025 წლის 12 ოქტომბრიდან, შესვლა-გასვლის სისტემა თანდათანობით ჩაიწერს:
- მონაცემებს სამგზავრო დოკუმენტიდან;
- მგზავრობის თარიღებს;
- ბიომეტრიულ მონაცემებს ევროკავშირის მონაცემთა დაცვის წესების შესაბამისად;
მოგზაურობის ავტორიზაციის ევროპული სისტემა, იგივე ETIAS-ი ეტაპობრივად ამოქმედდება”, – წერია საელჩოს მიერ გავრცელებულ ინფორმაციაში.
ETIAS-ის ამოქმედების სხვადასხვა ფაზა გარდამავალ და საშეღავათო პერიოდებს მოიცავს. ევროპული ბლოკის მიზანია, მოგზაურები შეეჩვიონ ETIAS-ის სისტემას, ვიდრე ის სავალდებულო გახდება.
გავრცელებული ინფორმაციით, 12 ოქტომბრიდან გარდამავალი პერიოდი 6 თვეს გაგრძელდება. ამ დროის განმავლობაში, ევროკავშირი მოგზაურებს მოუწოდებს, ავტორიზაციის სისტემით ისარგებლონ, თუმცა ის EU-ს საზღვრებში მოსახვედრად სავალდებულო არ იქნება.
გარდამავალი პერიოდის შემდეგ საშეღავათო პერიოდი ამოქმედდება, რომლის ფარგლებშიც მოგზაურობის ETIAS-ით ავტორიზება სავალდებულო იქნება თითქმის ყველა მოგზაურისთვის, გარდა მათთვის, ვინც:
- ევროკავშირში პირველად შედიან და სხვა ყველა საჭირო მოთხოვნას აკმაყოფილებენ;
- ვინც ETIAS-ით გარდამავალ პერიოდში ისარგებლებს;
საშეღავათო პერიოდიც, სავარაუდოდ, 6 თვეს გაგრძელდება.
ევროკავშირის ცნობით, მოგზაურობის ავტორიზაციის სისტემის საჭიროება მას შემდეგ გაჩნდება, რაც ბლოკი შესვლა/გასვლის სისტემას (EES, Entry/Exit System) აამოქმედებს, თუმცა ამ სისტემის განხორციელება არაერთხელ გადავადდა. ბოლო მონაცემებით, ETIAS-ის სავარაუდო ამოქმედების ვადად 2025 წლის ბოლო ან 2026 წელი განისაზღვრა.
ETIAS-ის სრული ამოქმედების შემდეგ აპლიკანტები განაცხადის გაკეთებას ონლაინ, ვებგვერდიდან ან აპლიკაციის მეშვეობით შეძლებენ. ევროკომისიის მიერ გამოქვეყნებულ ინფორმაციაში წერია, რომ ETIAS-ის აღება ევროკავშირთან უვიზო მიმოსვლის მქონე ქვეყნებისთვისაც სავალდებულო იქნება. რაც შეეხება საფასურს, მისი გადახდა სავალდებულოა 18-70 წლამდე ასაკის ვიზიტორებისთვის. ევროკავშირის განცხადებით, ETIAS-ი ევროკავშირის წევრი ქვეყნების მოქალაქეებსა და რეზიდენტებს არ შეეხებათ და ისინი ბლოკის შიგნით თავისუფლად გადაადგილდებიან.
QR კოდი
სტატიის ციტირება
შენი ემიგრანტი. (2025). რა იცვლება 12 ოქტომბრიდან EU-ში შესვლისას? – ყველაფერი ETIAS-ის შესახებ. 3 ოქტომბერი, 2025. https://sheniemigranti.ge/ra-itsvleba-12-oktombridan-eu-shi-shesvlisas-qvelaferi/
