იგი დაიბადა თბილისში 1963 წელს. 10 წლის ასაკში გაიმარჯვა ფიგურული სრიალის ჩემპიონატში, შემდეგ ჩააბარა თბილისის ქორეოგრაფიულ სასწავლებელში, სწავლა განაგრძო მოსკოვის დიდი თეატრის ქორეოგრაფიულ სასწავლებელში ზოლოტოვას ხელმძღვანელობით.
მოსკოვის დიდი თეატრის სცენაზე შეასრულა სვანილდას, ოდეტა-ილივიას, ავრორას, ჟიზელის, რაიმონდას, მარის, ნიკიას, რიტას პარტიები, წამყვანი პარტიები დადგმებში „სილფილდა“, „პახიტა“, „პა დე კატრი“, „ვარდის აჩრდილი“ და სხვა.
1988 წლიდან გამოდიოდა მსოფლიოს ყველაზე პრესტიჟულ სცენებზე. ის იყო პირველი მოცეკვავე, ანდრის ლიეპასთან ერთად, ყოფილი სსრკ-დან, რომელიც მიიწვიეს ბალანჩინის თეატრში „ნიუ-იორკ სიტი ბალე“, სადაც იცეკვა ჯორჯ-ბალანჩინის ბალეტებში „სიმფონია დო მაჟორი“, „აპოლო“, „რაიმონდა ვარიაციები“. იგი ასევე გამოდიოდა ინგლისის სამეფო ბალეტში (კოვენტ-გარდენი), დანიის სამეფო თეატრში…
1992 წელს ნინო ანანიაშვილი ამერიკული ბალეტის თეატრის სოლისტი გახდა, შეასრულა პარტიები მეტროპოლიტენ ოპერის სპექტაკლებში: „გედების ტბა“, „დონ კიხოტი“, „მძინარე მზეთუნახავი“, “რომეო და ჯულიეტა“, „მანონიო“, „მხიარული ქვრივი“, „კონკია“.
2004 წელს დაინიშნა ზაქარია ფალიაშვილის სახელობის თბილისის ოპერისა და ბალეტის თეატრის სამხატვრო ხელმძღვანელად.
ამერიკელი კრიტიკოსების მიერ აღიარებულია, როგორც „კლასიკური ბალეტის შეუდარებელი სუპერვარსკვლავი“. ნინო ანანიშვილის მინიჭებული აქვს ოთხი უმაღლესი საერთაშორისო საბალეტო კონკურსის ჯილდო. შესანიშნავი ტექნიკის, დახვეწილი და ნატიფი სტილის, ნარნარი მოძრაობის და იშვიათი დრამატული ნიჭის გამო, ნინო ანანიაშვილი ჩვენი დროის ყველაზე ცნობილ ბალერინად ითვლება.
2017 წელს იაპონიის იმპერატორის პრემია გადაეცა იაპონიასა და საქართველოს შორის კულტურულ ურთიერთობებში ხანგრძლივი და მრავალფეროვანი მოღვაწეობისა და იაპონური საბალეტო საზოგადოების განვითარებაში შეტანილი მნიშვნელოვანი წვლილისთვის. მას ასევე მიღებული აქვს უამრავი ჯილდო და დამსახურება მსოფლიოს სხვადასხვა ქვეყანაში.
იგი დღესაც ყველაზე ცნობილი ბალერინაა, რომელიც წლებია, ასწავლის ქართველ მოცეკვავეებს ბალეტს და აძლევს იმ ცოდნას მოსწავლეებს, რაც წლების განმავლობაში დააგროვა.
ფოტო: Ivan S / Pexels
