თუ გაინტერესებთ, რა პრობლემებს შეიძლება გადააწყდეთ საზღვარგარეთ სწავლის დროს, ეს სტატია თქვენთვისაა!
ერთ გოგონას ისტორიას გიამბობთ – მარიამ გაფრინდაშვილი საქართველოდან იტალიაში განათლების მისაღებად წავიდა და საინტერესოა, როგორ მოახერხა მან ადაპტაცია ახალ გარემოსთან, როგორ შეეგუა ის იტალიურ ცხოვრებას, იქაურ განათლების სისტემას…
მარიამი გვიამბობს, თუ როგორი იყო მისთვის ცხოვრების ახალ ეტაპზე გადასვლა და განათლების სრულიად უცხო გარემოში მიღება:
-მარიამ, როგორ მოხვდი იტალიაში და რომელ უნივერსიტეტში სწავლობ?
– Universita di Trento – ეს ჩემი უნივერსიტეტია. თავდაპირველად რამდენიმე უნივერსიტეტში გავაგზავნე აპლიკაცია და ერთ-ერთი მათგანისგან მომივიდა თანხმობა. შემდეგ თავად უნივერსიტეტმა დამინიშნა სტიპენდია და, შესაბამისად, ვსწავლობ აქ.
– გვიამბე, როგორია განათლების სისტემა იტალიაში და რთულია თუ არა უცხო ქვეყანაში მარტო ყოფნა?
-კი, საკმაოდ რთულია… რეალურად უცხოელი სტუდენტისთვის აქ ცხოვრება ბევრ სირთულესთან არის დაკავშირებული. მაგალითისთვის-ფინანსურად, სტიპენდიის მიუხედავად, ძალიან ბევრი რამ არის გასათვლელი… თუ რამდენიმე წელი გიწევს დარჩენა, აქაური საბუთების მოგვარებას დიდი დრო და ფინანსები სჭირდება. განსაკუთრებით ახლა, როცა პრემიერი შეიცვალა და ემიგრანტებისთვის ბევრად უფრო დამძიმდა პირობები. თუნდაც ის, რომ ახალი კანონით 700 ევროს გადახდა სავალდებულო გახდა დაზღვევის გასააქტიურებლად, რასაც ვერავინ აუვლის გვერდს.
საგანმანათლებლო სისტემაში კი, მაგალითად, ერთი ყველაზე პრიმიტიული პრობლემა ისაა, რომ ლექტორებს, რომლებიც ინგლისურენოვან ფაკულტეტზე ასწავლიან, ხანდახან საერთოდ ავიწყდებათ, რომ ინტერნაციონალური სტუდენტი ზის აუდიტორიაში და იტალიურად იწყებენ საუბარს.
აქ ბევრად უფრო სისტემატური სახე ეძლევა სწავლის გახანგრძლივებას და წლების დამატებას, თითქმის არავინ ელის ხოლმე, ფიქსირებულ პერიოდში რომ უნივერსიტეტს დაამთავრებს… საქართველოში თეზისზე მუშაობას პარალელურ რეჟიმში იწყებ გამოცდების ჩაბარებასთან ერთად. აქ სანამ ყველა გამოცდა ჩაბარებული არ გაქვს, ხელმძღვანელი არ აგიყვანს, ეს კი ავტომატურად ნიშნავს სემესტრის ან წლის დამატებას. ისინი ვერ იაზრებენ, რომ ინტერნაციონალური სტუდენტისთვის შესაძლოა, ფინანსურადაც კი რთული იყოს სემესტრის ან წლის დამატება.
უცხოეთში სწავლა დიდი გამოწვევაა სურვილთან ერთად და მინდა, მარიამს წარმატებები ვუსურვო. ის ძალიან ჭკვიანი და ყოჩაღი გოგონაა, ამოტომ ყველა გამოწვევას გაუმკლავდება!
ავტორი: ლიზი გრიგოლავა
