Biujeturi.ge — როგორ შექმნა მოგზაურმა პროგრამისტმა AI-ის დახმარებით ყველასთვის სასარგებლო ვებგვერდი
ინტერვიუ გიგი მჭედლიშვილთან — ბიუჯეტური მოგზაურობის პლატფორმის შემქმნელთან, რომელიც მოგზაურობს, არის პროგრამისტი და იყენებს AI-ს არა მხოლოდ სამუშაოში, არამედ ცხოვრებაში… გიგიმ შექმნა ვებგვერდი, რომელიც მოგზაურობის დაგეგმვაში ნამდვილად დაგეხმარებათ…
— გიგი, პირველ რიგში, გაეცანით ჩვენს მკითხველს – როგორ გაჩნდა ბიუჯეტური.ge-ის შექმნის იდეა?
— მე ვარ გიგი მჭედლიშვილი. ვმუშაობ კერძო კომპანიაში კლინიკურ კვლევებზე და ვარ პროგრამისტი. მიუხედავად იმისა, რომ ვმუშაობ ტექნიკურ სფეროში, ვებდიზაინერი არასდროს ვყოფილვარ. სწორედ აქ ჩაერთო ხელოვნური ინტელექტი — AI-ის წყალობით შევძელი, რომ დამოუკიდებლად, დიზაინის ცოდნის გარეშე შემექმნა სრულფასოვანი ვებგვერდი.
ბიუჯეტური.ge-ის იდეა კი მაშინ დაიბადა, როცა მოგზაურობა დავიწყე და ვეძებდი იაფ ბილეთებსა და სასტუმროებს. ყველაფერი დიდ დროს და ენერგიას მოითხოვდა. მერე მეგობრებმა მირჩიეს, საიტი გააკეთე და სხვებსაც დაეხმარეო – გავაკეთე კიდეც.
— ანუ იდეის ძირითადი ნაწილი თქვენს პირად გამოცდილებაშია?
— დიახ. როცა მივხვდი, რომ ბევრი ადამიანისთვის რთულია იაფად მოგზაურობის დაგეგმვა — ან ენის ბარიერი აქვთ, ან უბრალოდ ეზარებათ ძებნა — გადავწყვიტე, ყველაფერი ერთ სივრცეში შემეკრიბა. ბიუჯეტური.ge-ზე განთავსებულია ყველა ის სერვისი და რესურსი, რაც ადამიანებს დაგეგმვისას სჭირდებათ: ბილეთების მოძებნა, სასტუმროს დაჯავშნა, და სხვა. თანდათან ახალ ფუნქციებს ვამატებ — რაც იდეები მომდის, ყველაფერს ვრთავ.
— როგორი პრინციპით მუშაობს თქვენი საიტი?
— მარტივად რომ ვთქვათ, ბიუჯეტური.ge არის ისეთი რესურსების ერთიანი სივრცე, რომელთა ნაწილი ადამიანებმა შეიძლება არც იცოდნენ. სწორედ ამიტომ გავაერთიანე ყველა საჭირო პლატფორმა და სერვისი ერთ ვებგვერდზე — რომ დაგეგმვა გახდეს ხელმისაწვდომი ყველასთვის, მათთვისაც კი, ვინც ინგლისურად მხოლოდ მცირედად საუბრობს.
— რამდენად დაინტერესდა ხალხი? და როგორი რეაქცია ჰქონდათ ტურისტულ სააგენტოებს?
— მომხმარებლების მხრიდან დიდი დაინტერესება წამოვიდა, თუმცა პარალელურად, კომენტარებში გამოჩნდა აგრესია ტურისტული სააგენტოებისგან. ბევრჯერ სცადეს ეჭვი შეეპარებინათ საიტის სანდოობაში. ალბათ იგრძნეს, რომ პლატფორმამ კონკურენცია გაუწიათ. თუმცა სიმართლე ისაა, რომ მე ეს საიტი ჩემთვისაც გავაკეთე — და ვინც მოინდომებს, იმას ნამდვილად დაეხმარება.
— მოდით, ხელოვნურ ინტელექტზეც ვთქვათ რამდენიმე სიტყვა. თქვენ პროგრამისტი ხართ — როგორ შეცვალა AI-მა თქვენი ცხოვრება?
— AI ჩემთვის ყველაფერს ცვლის. ადრე რაც შეუძლებლად მეჩვენებოდა, ახლა უკვე ადვილად მისაწვდომია. მაგალითისთვის, ვებდიზაინში საერთოდ არ მქონდა გამოცდილება, მაგრამ AI-ის დახმარებით შევძელი. ის გაძლევს არა მხოლოდ ინსტრუმენტებს, არამედ გზას — სწავლობ, აკეთებ, და თან ვითარდები.
— თქვენივე პროფესიის გარეთაც იყენებთ AI-ს?
— რა თქმა უნდა. ის საშუალებას გაძლევს, გაამარტივო ენის სწავლა, მოძებნო ინფორმაცია, დაგეგმო მოგზაურობა… პრაქტიკულად უკვე ისე განვითარდა, რომ შეძლებს დაგიგეგმოს ტური თავიდან ბოლომდე: ავიაბილეთით დაწყებული, მარშრუტით დასრულებული. უფასო ვერსიებიც კი საკმარისია იმ ინფორმაციის მისაღებად, რისთვისაც ადრე ტურ ოპერატორს მივმართავდით.
— როგორც ჩანს, მოგზაურობა თქვენი ჰობია?
— დიახ. უკვე 3 წელია, ინტენსიურად ვმოგზაურობ. დაახლოებით ყოველ სამ თვეში ერთხელ ვახერხებ სადმე წასვლას. რაც დრო გადის, მით უფრო ვრწმუნდები, რომ ეს ჩემთვის ცხოვრების სტილია.
— ყველაზე შთამბეჭდავი მოგზაურობა რომ გაიხსენოთ?
— სიმართლე რომ გითხრათ, კონკრეტული ვერ გამოვარჩევ. ყოველი ქვეყანა თავისებურად განსხვავდება საქართველოსგან და ყოველი დაბრუნება არის ახალი ემოცია. სულ ვფიქრობ — იქაც კარგია, მაგრამ ჩემი სამშობლო მაინც მირჩევნია…
— არის რამე, რაც გსურთ, რომ დაამატოთ ამ ინტერვიუს ბოლოს?
— მხოლოდ ის მინდა ვთქვა, რომ ყველას შეუძლია ისარგებლოს ბიუჯეტური.ge-ს რესურსებით. გადადით, მოძებნეთ თქვენი მოგზაურობის ბიუჯეტური ვარიანტები — ყველაზე იაფი ბილეთები, სასტუმროები და ყველა საჭირო ინფორმაცია ერთ სივრცეშია თავმოყრილი.
გიგი მჭედლიშვილის გამოცდილება არის მკაფიო მაგალითი იმისა, თუ როგორ შეუძლია AI-ს შეცვალოს ყოველდღიურობა, და როგორ შეიძლება, ერთი ადამიანის იდეა სხვებისთვისაც სასარგებლო გახდეს.
