ექსკლუზიური ინტერვიუ მარიამ ბაზმანთან, რომელიც ემიგრანტებს ენას უანგაროდ ასწავლის – Bazmani ✨️
ავტორი: თამარ ჭანკვეტაძე
sheniemigranti.ge გთავაზობთ ექსკლუზიურ ინტერვიუს ქართველ ემიგრანტ მარიამ ბაზმანთან, რომელმაც წარმატებული კარიერა იტალიაში აიწყო. იგი სრულიად უსასყიდლოდ თავის YouTube არხზე სახელწოდებით “Bazmani” ტვირთავს ვიდეო გაკვეთილებს, რომელთა მეშვეობითაც ქართველ ემიგრანტებს ეხმარება იტალიური ენის შესწავლაში.
მარიამი პროფესიით ლინგვისტი და კულტურებს შორის მედიატორია, ამიტომ თავისი ავტორობით გამოსცა 5 წიგნი, რომელმაც აღიარება ჰპოვა იტალიაში მცხოვრებ ქართველ ემიგრანტებში…
– მარიამ, რამდენი ხანია, რაც ემიგრაციაში იმყოფებით და რატომ აირჩიეთ იტალია?
– 13 წელია, რაც იტალიაში ვცხოვრობ. თავიდან დედამ დატოვა სამშობლო და 2 წლის შემდეგ, როდესაც ყველა საბუთი მოაგროვა, რაც საჭირო იყო მამაჩემის, ჩემი და ჩემი ძმისთვის, ჩვენც იტალიაში წაგვიყვანა საცხოვრებლად. ჩემთვის ეს სიახლე ძალიან სასიამოვნო იყო, რადგან ბავშვობიდან მიყვარდა იტალია და იტალიური ენა.
– როგორი გრძნობაა უცხო მიწაზე ცხოვრება და მეგობრებისა და ნათესავების მონატრებაში ყოფნა?
– რა თქმა უნდა, ჩემი სამშობლო საქართველოა და მის სიყვარულს ვერავინ შემიცვლის, მაგრამ იმდენად პატარა ვიყავი, როცა იტალიაში ჩავედი, აქ დავიწყე ცხოვრება, რადგან იტალიაში შევიძინე მეგობრები, მივიღე განათლება, დავიწყე მოგზაურობა, აქ მქონდა პირველი სამსახური და რაც მთავარია მყავდა გვერდით ოჯახი. შესაბამისად, არ გამჭირვებია საქართველოდან წასვლა, მაგრამ ძალიან მიყვარს ჩემი სამშობლო!
– მარიამ, 4 წლის წინ გამოჩნდით “YouTube” პლატფორმაზე, სადაც დაიწყეთ ვიდეო გაკვეთილების ატვირთვა და იტალიური ენის უანგაროდ სწავლება. რა იყო თქვენი მიზანი…?
-2020 წელს, როდესაც YouTube არხი შევქმენი, სახელწოდებით “Bazmani” , მხოლოდ დახმარების სურვილი მამოძრავებდა. იქიდან გამომდინარე, რომ ჩემს თავზე მაქვს გამოცდილი, თუ როგორი რთულია უცხო ქვეყანაში ჩახვიდე ისე, რომ ამ ენაზე ერთი სიტყვის წარმოთქმაც არ შეგეძლოს, გადავწყვიტე დავხმარებოდი იტალიაში ჩამოსულ ქართველ ემიგრანტებს, რომლებმაც არ იცოდნენ იტალიური ენა. თანაც ჩემი პროფესია არის ლინგვისტი და კულტურებს შორის მედიატორი, ამიტომ პირდაპირ ჩემი საქმე იყო ამის გაკეთება. ეს მიზანი მამოძრავებს დღესაც.
მინდა, ქართველმა ემიგრანტებმა იტალიაში დაიცვან მათი უფლებები და არავინ დაჩაგრონ ისინი, როსთვისაც სრულიად უანგაროდ გავცემ ჩემს ცოდნას ვიდეო გაკვეთილების სახით.
– საინტერესოა, სანაცვლოდ თქვენი აუდიტორიისგან თუ იღებთ მადლიერებას?
– პანდემიის დასრულების შემდეგ ვფიქრობდი, შემეწყვიტა ვიდეო გაკვეთილების ჩაწერა, რადგან თავისუფალი დრო აღარ მქონდა, თუმცა იმდენი ადამიანი ელოდებოდა ჩემს ვიდეოებს, რომ ფიზიკურად ვერ შევძელი მათთვის იმედების გაცრუება. რომ გადახედოთ ჩემს განრიგს, გაგიკვირდებათ თუ როგორ ვახერხებ ვიდეოების ჩაწერას, მაგრამ არ ვნებდები სწორედ მადლიერი აუდიტორიის გამო. ვიცი, რომ მოუთმენლად ელოდებიან ორშაბათს, ვიდეოების ატვირთვის დროს.
მე მათგან ვიღებ დიდ სითბოს, მხარდაჭერას, მადლიერებასა და სიყვარულს. ასე რომ არ იყოს, შევწყვეტდი ამდენი ენერგიის ჩადებას ვიდეო გაკვეთილებში.
– რა მნიშვნელობის მატარებელია თქვენთვის ეს ბლოგი?
– თავიდან სრულიად არ მქონდა ბლოგერობა გეგმაში. ჩემი ვიდეო გაკვეთილების ატვირთვა დავიწყე პანდემიის დროს, როდესაც უამრავი თავისუფალი დრო მქონდა და ვიფიქრე, გამომეყენებინა თავისუფალი დრო კეთილი საქმის კეთებაში. თუმცა ჩემმა ატვირთულმა ვიდეოებმა იმხელა გამოხმაურება დაიმსახურა, რომ დაუგეგმავად გავხდი ბლოგერი. თანაც, ეს არხი ჩემთვის უმნიშვნელოვანესია, რადგან ის თავს მაგრძნობინებს საქართველოსა და იტალიის დამაკავშირებელ ხიდად, რომელიც მყარი დასაყრდენია ქართველი ემიგრანტებისათვის.
– რთულია ისეთი ხარისხიანი და ინფორმაციული ვიდეო კონტენტის შექმნა, როგორსაც აქვეყნებთ… მარტო უმკლავდებით ამ შრომატევად საქმეს, თუ გეხმარებიან?
-საბედნიეროდ, ჩემს საქმიანობაში მეხმარება საუკეთესო მეგობარი, თინათინ მკალავიშილი, რომელიც მიმონტაჟებს ვიდეოებს, სწორედ მისი დამსახურებაა, ასეთი ხარისხიანი ვიდეოები რომ მაქვს არხზე. რომ არა ის, ჩემი განრიგიდან გამომდინარე იძულებული გავხდებოდი, ეს საქმიანობა მიმეტოვებინა.
–თქვენს ვიდეოებს 85 ათასამდე ნახვა აქვს, მაინტერესებს, რას გრძნობთ, როდესაც ამხელა ციფრს უყურებთ, არის ეს თქვენთვის მოტივაციის წყარო?
-მართლაც ძალიან ბევრი ნახვა აქვს ჩემს ვიდეოებს, რაც სიამაყით მავსებს. ეს ჩემთვის მამოტივირებელია. თანაც ამ ციფრებით ვხვდები, თუ რაოდენ
მნიშვნელოვან საქმეს ვაკეთებ ქართველებისთვის და როგორ ვეხმარები ათასობით ადამიანს სრულიად უფასოდ ცოდნის მიღებაში.
რა თქმა უნდა, რომ შემენიშნა დაინტერესებული ადამიანების ნაკლებობა, შევწყვეტდი ვიდეოების ატვირთვას, მაგრამ 4 წლის განმავლობაში ჩემი არხი იზრდება და იზრდება, ნახვების რაოდენობაც მატულობს. ამიტომ ეს არ მაძლევს მოდუნების და დანებების საშუალებას, პირიქით სტიმულია და მინდა მეტი გავაკეთო.
–მარიამ, თქვენს ცხოვრებაში გადადგით ბევრად რთული და საპასუხისმგებლო ნაბიჯი, ვიდრე ვიდეოების გადაღებაა, ვგულისხმობ წიგნების გამოცემას. გთხოვთ, მოგვიყვეთ თქვენი ქართულ-იტალიური წიგნების შესახებ და გვითხარით, როგორაა შესაძლებელი მათი შეძენა?
-ვიდეოების გადაღებიდან 2 წელში გადავწყვიტე, გამომეცა ჩემი ავტორობით წიგნი, რომელიც იყო იტალიური გრამატიკის გზამკვლევი საწყისი დონე. შემდეგ უკვე გამოიცა მაღალი დონის წიგნები და ბოლო პროექტი გახლდათ იტალიურ-ქართული და ქართულ-იტალიური ლექსიკონი. სულ ჯამში 5 წიგნია დაბეჭდილი ჩემი ავტორობით. თანაც, პროფესიიდან გამომდინარე მიწევს თარგმანზე მუშაობა, შესაბამისად, აუცილებლად დაიბეჭდებოდა ჩემი წიგნები ადრე თუ გვიან, უბრალოდ YouTube არხმა ეს პროცესი დააჩქარა. ამ წიგნების შეძენა შესაძლებელია იტალიაში, ადგილზე იყიდება ქალაქ რომში და ბარში, ხოლო სხვა ქალაქებში ვაგზავნი იტალიური ფოსტის დახმარებით. სამწუხაროდ, ამ ეტაპზე საქართველოში არ იყიდება, თუმცა მოლაპარაკებები მიმდინარეობს და იმედია, მალე ჩემს ქვეყანაშიც შევძლებ გაყიდვას.
–მარიამ, გაგვიზიარეთ თქვენი გეგმებიც…
-ზაფხულისთვის ვგეგმავ მე-6 წიგნის გამოქვეყნებას, რომელიც იქნება საწყისი დონის სავარჯიშოების წიგნი. შემოდგომისთვის კი მზად მექნება ყველაზე მნიშვნელოვანი პროექტი, რაზეც კი მიმუშავია, ონლაინ კურსი, რომლის შეძენაც შეეძლება ნებისმიერ ქვეყანაში მცხოვრებ ადამიანს. თანაც, კურსი იქნება ძალიან საინტერესო და მრავალფეროვანი სხვადასხვა ვიდეოებით, სავარჯიშოებით, მოსასმენი დავალებებით, ვიქტორინებით და სხვ.
–აპირებთ თუ არა საქართველოში დაბრუნებას?
-ჯერჯერობით საქართველოში სამუდამოდ საცხოვრებლად გადასვლაზე არ ვფიქრობ, თუმცა ახლო მომავალში მომიწევს რამდენიმე თვით ვიზიტი, რადან მოსაგვარებელი მაქვს ჩემი წიგნების საქართველოში გაყიდვის საკითხი. იქედან გამომდინარე, რომ მათზე ძალიან დიდი მოთხოვნაა მინდა ქართველებმაც შეძლონ შეძენა და გამოყენება.
