დედაენის დღე საქართველოს საელჩომ მადრიდში მცხოვრებ ქართულ დიასპორასთან ერთად კონცერტით აღნიშნა.
მადრიდის კულტურის ცენტრში გამართულ კონცერტში მონაწილეობდნენ მადრიდის წმინდა გიორგის სახელობის ტაძრის გუნდი “იადგარი”, ანსამბლი “ფესვები”, ეკლესიასთან არსებული საკვირაო სკოლა “აისი”, ალკობენდას საკვირაო სკოლა “ბეღურა” და მასთან არსებული ხალხური საკრავების სტუდია, ქართული ცეკვების აკადემია “ჯორჯია”, ტრიო “სიმები” და სხვა ქართველი მუსიკოსები.
კონცერტში მონაწილე 100-მდე ბავშვმა და მოზარდმა მშობლიური ქართული ენის დღეს მიუძღვნეს ლექსები, ხალხური სიმღერები და ქორეოგრაფიული ნომრები, სავიოლინო და საფორტეპიანო შესრულებით აჟღერდა კომპოზიტორ გია ყანჩელის მუსიკა. კონცერტს 300-მდე სტუმარი დაესწრო.
კონცერტი გაიმართა ესპანეთის სამეფოში საქართველოს საელჩოს ინიციატივითა და ორგანიზებით. ქართულ დიასპორას დედაენის დღე მიულოცეს საქმეთა დროებითმა რწმუნებულმა ნატო ჩიქოვანმა და საქართველოს პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ, რომელიც ოფიციალური ვიზიტით ესპანეთში იმყოფებოდა.
საელჩო მადლობას უხდის საკვირაო სკოლების, მუსიკალური და ქორეოგრაფიული ანსამბლების პედაგოგებსა და მოსწავლეებს უდიდესი გარჯისთვის.
