ქართველი ემიგრანტი, რომელიც იტალიაში ხელნაკეთი თოჯინებით ემიგრანგ ბავშვებს ახარებს
ავტორი: ლიზი გრიგოლავა
sheniemigranti.ge გთავაზობთ ინტერვიუს იტალიაში მცხოვრებ ქართველ ემიგრანტ ხათუნა გოლიაძესთან, რომელიც თოჯინებს ქმნის ემივრანტი ბავშვებისთვის… ქალბატონი ხათუნა ინტერვიუში ამბობს, რომ სურს, რომის სამრევლოს ბავშვებს გადასცეს ხელნაკეთი სათამაშოები…
– ქალბატონო ხათუნა, რამდენი ხანია, რაც იტალიაში ცხოვრობთ? როგორ შეეგუეთ ემიგრანტობას ახალ ქვეყანაში?
-იტალიაში დაახლოებით ორი წლის წინ ჩამოვედი. სანამ წამოვიდოდი, ვიცოდი, რომ ყველაფერი იოლი არ იქნებოდა – როგორც აქ ცხოვრების გაგრძელება უცხო მიწაზე, ისე ოჯახის წევრების დატოვება. თუმცა საკუთარ თავს პირობა მივეცი, რომ ღმერთის დახმარებით ყველაფერს შევძლებდი.
– გვიამბეთ თქვენს საინტერესო საქმიანობაზე – როგორც გავიგეთ, თოჯინების შექმნა დაიწყეთ და ემიგრანტების შვილებს ახარებთ… მოგვიყევით, როდის გაგიჩნდათ ეს იდეა?
– რაც შეეხება ქსოვას, ბავშვობიდან ვქსოვ, თოჯინების ქსოვა კი აქ დავიწყე. ყოველთვის მაინტერესებდა ხელნაკეთი ნივთები, მაინტერესებდა თოჯინების შექმნა. ერთმა მადლიანმა ქალბატონმა ამიხსნა და მასწავლა, რომლისაც მადლიერი ვარ და მას შემდეგ ვქმნი ჩემს „პატარებს“… ბავშვების გახარების იდეა, ვერ გეტყვით, როდის გამიჩნდა. ახლა კი მინდა, თოჯინები დავამზადო რომის სამრევლო ბავშვებისთვის.
– რას ურჩევდით იმ ქალბატონებს, ვინც ახლა აპირებს იტალიაში ჩამოსვლას – რა უნდა გაითვალისწინონ იმისთვის, რომ ინტეგრაციის პროცესი შედარებით მარტივად გაიარონ?
– როცა ამა თუ იმ საქმიანობაში ნაბიჯს დგამ, ყველა სირთულეს, ყველა დაბრკოლებას იოლად უნდა შეხედო. არა მუქ, არამედ ნათელ ფერებში. საკუთარ თავს მუდამ უნდა უთხრა, რომ ეს არაფერია, მე ამას შევძლებ, მე გავაკეთებ და ყველაფერი გამოგივა. ( ყოველი შემთხვევისთვის, ეს ჩემი აზრია).
– რა გენატრებათ ყველაზე მეტად სამშობლოდან ასე შორს და რას ეტყოდით ჩვენს მკითხველს, როგორც ემიგრანტი?
– რა მენატრება?- მონატრებაზე ფიქრის უფლებას თავს არ ვაძლევ. ალბათ, ეს მაძლებინებს… ოჯახი, დედაჩემი, რომელიც ჩემთვის ყველაფერია… ემიგრანტობამ ძალიან ბევრი რამ მასწავლა. ჩემო საყვარელო, ემიგრანტებო, ღვთის მფარველობა არ მოგშლოდეთ, მალე დაბრუნდებოდეთ საკუთარ ოჯახებს. წარსულს ვერ შევცვლით… ამიტომ ვიაროთ წინ, რომ მომავალი უკეთესი და წარმატებული გვქონდეს. ვაკეთოთ გულით ის საქმე, რისი გაკეთების საშუალებასაც გვაძლევს ცხოვრება და, რაც მთავარია, გვიყვარდეს ერთთმანეთი!
#drpkhakadze #gochadze #sheniemigranti
ფოტო: İsra Nilgün Özkan / Pexels
