საშობაო ბაზრობები ევროპაში- როცა საქმე წლის ყველაზე დიდი სადღესასწაულო სეზონის მოსვლას ეხება, ევროპის სხვადასხვა ქვეყნის საშობაო ბაზრები ის უმთავრესი ღირსშესანიშნაობებია, რომელთა ხილვაც თავს ფილმის გმირად გაგრძნობინებთ. როგორც წესი, საშობაოდ, ევროპის ბაროკოსა და შუასაუკუნეების დროინდელი მოედნები მორთულია ათასგვარი განათებით და ბევრგან, ამაღლებულ განწყობას, ქათქათა თოვლიც ემატება და მართლაც ჯადოსნურ გარემოს ქმნის. მიუხედავად იმისა, რომ ევროპის უამრავ ქვეყანასა და ქალაქში შეხვდებით გასაოცრად მოწყობილ ბაზრობებს, ამ ბლოგში, გადავწყვიტეთ 5 განსაკუთრებულად ზღაპრული საშობაო ბაზრობა გაგაცნოთ, რომელიც იმედებს არ გაგიცრუებთ:
კიოლნი, გერმანია (18 ნოემბერი 2024 – 23 დეკემბერი 2024)
გერმანია, როგორც საშობაო ბაზრობების მეფე, არც 2024 წელს არღვევს ტრადიციას და ვიზიტორებს საუკეთესო და ყველაზე მრავალფეროვან თავგადასავლებს ჰპირდება. მაგალითად, კიოლნს რამდენიმე საშობაო ბაზრობა აქვს, რომელთაგან ყველაზე დიდი ქალაქის ცენტრში, ტაძრის ქვეშაა განთავსებული.
- Markt der Engel, ჯადოსნური მომენტების შესაქმნელადაა განკუთვნილი, სადაც ასობით მოციმციმე შუქი ვარსკვლავებივითაა ჩამოკიდებული და ირგვლივ, საშობაო ანგელოზები, დახვეწილად მორთულ ღობეებს შორის ტრიალებენ.
- Nikolausdorf (წმინდა ნიკოლოზის საშობაო სოფელი) ახალგაზრდებზეა ორიენტირებული და წმინდა ნიკის ისტორიას მოგვითხრობს, ბაზრობას ფონად მე-13 საუკუნის ჰანენის კარიბჭე ამშვენებს, რომელიც მის მისტიკურობასა და ზღაპრულობას განაპირობებს. კიოლნში შეხვდებით მითიური ჯუჯებისა თუ მეკობრეების თემატიკისათვის მიძღვნილ საშობაო ბაზრობებს.
მათთვის კი, ვისაც ბაზრობებზე სეირნობასთან ერთად, სხვა საშობაო გამოცდილებებით აინტერესებთ, Heinzels Winter Fairytale-სა და Heumarkt-ზე ციგურებით სრიალსაც ვურჩევდით, სადაც ცოცხალი მუსიკა, თბილი სასმელი და გემრიელი სასუსნავებიც დახვდებათ. ეს შესანიშნავი ატრაქცია 25 ნოემბრიდან 5 იანვრამდე გაგრძელდება (საციგურაო მოედანი დახურულია 24 და 25 დეკემბერს).
ზალცბურგი, ავსტრია (21 ნოემბერი 2024 – 1 იანვარი 2025)
უძველესი ტრადიციებითა და საუკეთესო საშობაო გალობებით ცნობილი ზალცბურგი, რომელიც ამავდროულად, მოზარტის მშობულიური ქალაქია, შობის პერიოდში იმთავითვე გაგახსენებთ ყველასათვის საყვარელ მიუზიკლს The Sound of Music და თოვლით გაჟღენთილ ქუჩებში ყველაზე ტკბილად მოისმენთ Silent Night-ს, რომელიც სწორედ ზალცბურგში დაიწერა და პირველად, იქვე შესრულდა.
ზალცბურგის საშობაო ბაზრობები, გარდა მუსიკალური ღირებულებისა, გამორჩეულია იმ კუთხითაც, რომ სადგომების იერსახე თითქმის უცვლელადაა შენარჩუნებული და წარმოადგენს იმის იდენტურ დიზაინს, რომელიც თავდაპირველად, ჯერ კიდევ მეთხუთმეტე საუკუნეში შეიქმნა.
ზალცბურგის საშობაო ბაზრობებზე, როგორც წესი, მნიშვნელოვანია ხარისხი და არა რაოდენობა, ამიტომაც აქ უფრო მეტად შეხვდებით ხელით ნაქსოვ წინდებს და არა ქარხნულ სანთლებსა თუ შანდლებს. დამატებით, განწყობის შესაქმნელად შეგიძლიათ ეწვიოთ საშობაო კონცერტებსაც, სადაც დასწრება უფასოა. კონცერტები გაიმართება ყოველდღიურად 17:00 საათზე ტაძრის წინ, ან შეგიძლიათ თავადაც შეუერთდეთ მგალობლებს სამშაბათობით და მათთან ერთად იმღეროთ, რაც შესაძლებელია 18:00-20:00-ის მონაკვეთში.
ბუდაპეშტი, უნგრეთი (15 ნოემბერი 2024 – 1 იანვარი 2025)
საუკეთესოა ყინულის მოედანზე და საშობაო ილუმინაციებისთვის
ნოემბრის შუა რიცხვებიდან, ბუდაპეშტში, საშობაო ატმოსფეროს ორი პოპულარული საშობაო ბაზარი ქმნის: Vorosmarty Square და Basilica. ვოროსმარტის მოედანი ქალაქის ცენტრში მდებარეობს და ბუდაპეშტის უძველესი საშობაო ბაზარია. აქ უამრავ კვების ჯიხურს, ხელნაკეთი ნივთების მაღაზიებსა და უფასო კონცერტებს იხილავთ. ბაზილიკას კი, ყოველივე ზემოთქმულთან ერთად, მცირე უპირატესობაც აქვს: საშობაო ლაზერული პროექციები, რომელიც თავად ბაზილიკაზეა მოთავსებული და ყინულის მოედანი, რომელიც დიდებული საახალწლო ნაძვის ხის ირგვლივაა გარშემორტყმული.
პრაღა, ჩეხეთის რესპუბლიკა (30 ნოემბერი 2024 – 6 იანვარი 2025)
ულამაზესი პრაღა შესანიშნავი არჩევანია სადღესასწაულო სეზონისთვის. აქ, გლინტვეინის ნაცვლად, თქვენი ჭიქა გროგით შეივსება, რომელიც არის რომის, წყლის, ლიმონისა და შაქრის ნაზავი. პრაღაში აღმოჩენისთანავე მიხვდებით, რომ საშობაო გარემო იდეალურია: ერთ მხარეს, მე-14 საუკუნის ტინსკის ტაძარი (Church of Our Lady before Týn); მეორე მხარეს კი, ქალაქის ცნობილი მე-15 საუკუნის ასტრონომიული საათი.
პრაღაში გამართულ საშობაო ბაზრობებზე უამრავ აქსესუარს, ნაძვის ხის სათამაშოს, თუ ორიგინალურ საახალწლო საჩუქარს წააწყდებით. იქვე, შეძლებთ ძალიან გემრიელად ვახშმობასაც: ტრადიციული ძეხვეული გრილზე; ახალი, ფუმფულა ბლინები; ნიორითა და ყველით შეზავებული ლავაში. ეს ყველაფერი კი, გაჯერებულია სვარაკის, ადგილობრივი, ციტრუსოვანი გლინტვეინის სურნელით, რომელიც მთელს მოედანზე იფრქვევა.
ტალინი, ესტონეთი (22 ნოემბერი 2024 – 27 დეკემბერი 2024)
ტალინში სადღესასწაულო სეზონი გასაოცარი მოვლენაა, სადაც საშობაო ბაზრობა განლაგებულია ამ ულამაზესი, შუა საუკუნეების ქალაქის ცენტრში, სადაც სახურავები და რიყის ქვები, როგორც წესი, თოვლით არის მოფენილი. ზამთარში, Town Hall Square სავსეა არა მხოლოდ ხის სადგომებით, სადაც ხელნაკეთი საახალწლო გვირგვინები, ხელოვნების ადგილობრივი ნიმუშები, ტკბილეული, თაფლი და ცხვრის ტყავის ფარდაგებია გამოფენილი, არამედ დაგხვდებათ ორკესტრიც, რომელიც ცოცხლად ასრულებს ზღაპრულ მელოდიებს და მათ ირგვლივ დაუღალავად მოცეკვავე ხალხი, რომელთა რიცხვშიც შესაძლოა თქვენც მარტივად აღმოჩნდეთ, რადგან ეს ჯადოსნური გაწყობა გადამდებია.
