საჰაერო ტრანსპორტის საერთაშორისო ასოციაციამ (IATA) წამოიწყო უსაფრთხოების გლობალური ინიციატივა სახელწოდებით „იმოგზაურე გონივრულად ლითიუმის ელემენტებით“. კამპანია მოგზაურებს შვიდ მარტივ წესს სთავაზობს, თუ როგორ გადაიტანონ უსაფრთხოდ მობილური ტელეფონები, ლეპტოპები, პორტატული დამტენები და სხვა მოწყობილობები ლითიუმის ბატარეებით ფრენის დროს.
კამპანიის შესახებ ინფორმაცია განთავსდება IATA-ს ვებგვერდსა და სოციალურ ქსელებში. მას ასევე შეეძლება გამოიყენოს ავიაკომპანიებმა, აეროპორტებმა და სხვა პარტნიორებმა.
„ლითიუმის ბატარეების მქონე მოწყობილობები უსაფრთხოა, როდესაც მათ სწორად ვმართავთ, მაგრამ შეიძლება საფრთხე შექმნან დაზიანების ან არასწორად შეფუთვის შემთხვევაში. რადგან სულ უფრო მეტი მგზავრი დაფრინავს ასეთი მოწყობილობებით, ჩვენი კამპანია დაეხმარება ავიაკომპანიებს, მიაწოდონ მგზავრებს მარტივი წესები ელექტრონულ მოწყობილობებთან მოგზაურობის შესახებ“, — განაცხადა ნიკ კიურინმა, IATA-ს ოპერაციებისა და უსაფრთხოების უფროსმა ვიცე-პრეზიდენტმა.
IATA-ს ბოლოდროინდელმა გამოკითხვამ აჩვენა, რომ მგზავრების უმეტესობა მოგზაურობს ლითიუმის ბატარეებზე მომუშავე მოწყობილობებით: 83% მობილური ტელეფონით, 60%ლეპტოპით და 44% პორტატული დამტენით.
მიუხედავად იმისა, რომ მოგზაურთა 93%-ს მიაჩნია, რომ იცნობს ლითიუმის ბატარეების გადაზიდვის წესებს, არსებობს რამდენიმე გაუგებრობა:
- 50% შეცდომით მიიჩნევს, რომ მცირე ზომის მოწყობილობების გადაზიდვა რეგისტრირებულ ბარგში ნებადართულია.
- 45% შეცდომით მიიჩნევს, რომ პორტატული დამტენების (power bank) რეგისტრირებულ ბარგში გადაზიდვა ნებადართულია.
კამპანიის მასალებში ჩამოთვლილია შვიდი მარტივი წესი, რომელიც ყველა მოგზაურმა უნდა დაიცვას:
- იმოგზაურეთ აუცილებელი ნივთებით: თან იქონიეთ მხოლოდ ის მოწყობილობები და ბატარეები, რომლებიც ნამდვილად გჭირდებათ.
- მიაქციეთ ყურადღება დაზიანებას: თუ მოწყობილობა გაცხელდა, ბოლავს ან დაზიანებულია, დაუყოვნებლივ შეატყობინეთ ეკიპაჟს ან აეროპორტის პერსონალს.
- მოწყობილობა იქონიეთ ხელბარგში: მობილური ტელეფონები, ლეპტოპები, კამერები და სხვა ბატარეაზე მომუშავე მოწყობილობები ყოველთვის ხელბარგში გადაიტანეთ და არა რეგისტრირებულ ბარგში.
- დაიცავით დაუმაგრებელი ბატარეები: სათადარიგო ბატარეები და გარე დამტენები შეინახეთ ორიგინალ შეფუთვაში ან დალუქეთ ტერმინალები ლენტით, რათა თავიდან აიცილოთ მოკლე ჩართვა.
- გაითვალისწინეთ გეითთან რეგისტრაცია: თუ თქვენი ხელბარგი გადადის თვითმფრინავის სატვირთო განყოფილებაში, ჯერ ამოიღეთ მისგან ყველა ლითიუმის ბატარეა და მოწყობილობა.
- შეამოწმეთ ბატარეის ზომა: დიდი ბატარეების (100 ვატ/საათზე მეტი, მაგალითად, დრონებისთვის) გადასაზიდად, მიმართეთ ავიაკომპანიას, რადგან მათ შეიძლება დასჭირდეთ ნებართვა.
- გაეცანით ავიაკომპანიის წესებს: ყოველთვის გადაამოწმეთ თქვენი ავიაკომპანიის პოლიტიკა, რადგან მოთხოვნები შეიძლება განსხვავდებოდეს ადგილობრივი რეგულაციების მიხედვით.
