ავტორი: ლიზი გრიგოლავა
მედიაჰოლდინგი “შენი” გაგაცნობთ 26 წლის კრისტინა ოჩიგავას, რომელიც ამჟამად სამხრეთ კორეაში ცხოვრობს. მის კორეულ თავგადასავალს კი, ამ ინტერვიუში გაიგებთ:
– კრისტინა, გვიამბე შენ შესახებ და გაეცანი ჩვენს მკითხველს…
– მოგესალმებით, მე ვარ კრისტინა ოჩიგავა, 26 წლის. დავიბადე და გავიზარდე რუსეთში, სკოლის დამთავრების შემდეგ ჩამოვედი საქართველოში და დავამთავრე თბილისის სამედიცინო უნივერსიტეტი.
– რამდენი ხანია, კორეაში ხარ და რას საქმიანობ იქ?
– იქიდან გამომდინარე, რომ ძალიან მომწონდა და მიყვარდა სამხრეთ კორეა, 2019 წელს დავიწყე კორეული ენის შესწავლა, როგორც ჰობის და 2022 წლის ბოლოს წავედი კორეაში. ერთი წელი ვსწავლობდი ენის შემსწავლელ კურსებზე სეულში, შემდეგ ჩავირიცხე უნივერსიტეტში კომუნიკაციური დიზაინის ფაკულტეტზე, გადავედი მე-2 კურსზე.
– რამდენად რთულია ემიგრაციაში ცხოვრება… რა სირთულეების გადალახვა მოგიწია?
– რა თქმა უნდა, თავიდან ძალიან მიჭირდა აქ ცხოვრება, შეგუება უცხო გარემოსთან, მაგალითად, დღემდე მახსოვს, როგორ პატარა ოთახში ვცხოვრობდი თითქმის ერთი წელი, სადაც მხოლოდ საწოლი და პატარა მაგიდა ეტეოდა, მაგრამ უკვე შევეჩვიე და ძალიან მომწონს აქ სწავლა და ცხოვრება, რაშიც ძალიან მეხმარებიან და მიმსუბუქებენ აქ ყოფნას ჩემი მშობლები.
– რა გენატრება ყველაზე მეტად საქართველოდან?
– მიუხედავად იმისა, რომ უკვე შევეჩვიე აქ ცხოვრებას, მაინც ძალიან მენატრება და მინდა საქართველოში ყოფნა, მენატრება ჩემი სახლი, ახლობლები, მეგობრები, მენატრება დედის მიერ მომზადებული ქართული კერძები, სულგუნი, ყველი, რომელიც კორეაში თითქმის არ არის. საქართველოში ჩამოსვლას მხოლოდ ზაფხულობით ვახერხებ.
– სამომავლოდ გეგმავთ საქართველოში დაბრუნებას?
– რა თქმა უნდა, სწავლის დამთავრების შემდეგ კარგი იქნებოდა საქართველოში დაბრუნება და ვფიქრობ მაგაზე, მაგრამ ვნახოთ, როგორი სიტუაცია იქნება უნივერსიტეტის დამთავრების დროს, იმედია, საქართველოშიც ვიპოვი ჩემს ადგილს ცხოვრებაში და საყვარელი პროფესიით შევძლებ მუშაობას.
– რას ეტყოდით მათ, ვინც ემიგრაციაზე ფიქრობს?
– რაც შეეხება რჩევებს, ალბათ, უფროსი თაობისთვის მრჩევლად ვერ გამოვდგები, მაგრამ ახალგაზრდებს, ვისაც სურვილი აქვთ საზღვარგარეთ სწავლის გაგრძელების, მათ ვურჩევდი, რომ ნუ შეგეშინდებათ, მთავარია მოინდომოთ, კარგად ისწავლოთ, ჩამოყალიბდეთ თქვენს არჩევანში, მოიძიოთ სწორი ინფორმაცია და ყველაფერს მიაღწევთ, ამას ჩემი გამოცდილებიდან გამომდინარე გეუბნებით, მეც ძალიან მეშინოდა, მეგონა, ვერ შევძლებდი, არ გამომივიდოდა, მაგრამ მე შევძელი და გამომივიდა და თქვენც აუცილებლად შეძლებთ და ყველაფერი გამოგივათ! ვუსურვებ ყველას წარმატებებს და მიზნების ასრულებას! ემიგრანტებს ვუსურვებ გამძლეობას და სამშობლოში მალე დაბრუნებას!
