10 ნოემბრიდან ევროკავშირის წევრ ქვეყნებში შესვლა-გასვლის წესები იცვლება, რაც გულისხმობს ახალი სისტემის, EES-ის (Entry/Exit System), დანერგვას. ეს სისტემა განკუთვნილია ევროკავშირის არაწევრი ქვეყნების მოქალაქეებისთვის და მიზნად ისახავს პასპორტებში ბეჭდის ჩარტყმის წესის გაუქმებას და მის ნაცვლად ბიომეტრიული მონაცემების გამოყენებას.
EES-ის ფარგლებში, ევროკავშირში შესვლისას მოგიწევთ სპეციალურ აპარატთან რეგისტრაციის გავლა, რაც მოიცავს თქვენი ფოტოს გადაღებას, თითის ანაბეჭდების დაფიქსირებას და პასპორტის მონაცემების სისტემაში შეყვანას. ეს მონაცემები EES-ში ორი ან სამი წლის განმავლობაში იქნება შენახული, და ყოველი შესვლისა და გასვლის დროს გაივლით ამ შემოწმებას, რაც გააადვილებს თქვენი გადაადგილების კონტროლს – სისტემაში დაფიქსირდება, როდის შეხვედით ან დატოვეთ ქვეყანა.
სისტემა განსაკუთრებით მნიშვნელოვანია მათთვის, ვინც 90 დღეზე მეტხანს აპირებს დარჩენას ევროკავშირის ტერიტორიაზე. სისტემის მიზანია, დააფიქსიროს ნებისმიერი დარღვევა, მაგალითად, თუ ვინმე ზედმეტ ხანს რჩება ევროკავშირში. აღსანიშნავია, რომ სისტემა ზოგიერთ ქვეყანაში დროებით კვლავ შემოინახავს პასპორტ კონტროლის (ბეჭდის ჩარტყმის) პროცესს, სანამ EES სრულად არ დამყარდება.
რისკის შემცველია თუ არა ეს ცვლილება? კი, რადგან EES გამოავლენს ყველა დარღვევას, და თუ ვინმე კანონის დარღვევით გაჩერდება ევროკავშირში, გარკვეული პერიოდის განმავლობაში მისთვის შესვლა აიკრძალება, თუნდაც გვარი ან პასპორტი შეიცვალოს. თუმცა, ეს სისტემა არ შეეხება იმ პირებს, ვინც ევროკავშირში ბინადრობის ნებართვით ცხოვრობს.
EES სისტემის დანერგვა ეხება არა მხოლოდ საქართველოს, არამედ ყველა ქვეყანას, ვისაც ევროკავშირთან აქვს ვიზა ლიბერალიზაცია. ეს მოიცავს მოლდოვას, სერბეთს, ალბანეთს, საქართველოს და სხვებს. ევროკავშირი ამ გზით ცდილობს, გააკონტროლოს მიგრანტების ნაკადი.
