გაგაცნობთ საპასპორტო ინფორმაციას, რომელიც გამოადგება როგორც საქართველოს, ასევე უცხო ქვეყნის მოქალაქეს
პირველ რიგში, უნდა ვიცოდეთ, რომ საქართველოში უვიზოდ შემოსული უცხო ქვეყნის მოქალაქეების სამგზავრო დოკუმენტი მოქმედი უნდა იყოს საქართველოში შემოსვლის (საზღვრის გადაკვეთის) დღისთვის და ითვალისწინებდეს საქართველოში ყოფნის ვადას, რათა არ მოხდეს სამგზავრო დოკუმენტის მოქმედების ვადის გაუქმება საქართველოს ტერიტორიაზე.
ასევე საჭიროა იმის ცოდნაც, რომ თუ თქვენ სამგზავრო დოკუმენტს გაუვიდა მოქმედების ვადა და ფლობთ საქართველოს მოქმედ ვიზას, ახალი ვიზის მისაღებად უნდა მიმართოთ საზღვარგარეთ აკრედიტებულ საქართველოს დიპლომატიურ წარმომადგენლობას ან საკონსულო დაწესებულებას.
თუ გაინტერესებთ, რა მოთხოვნებს უნდა პასუხობდეს უცხო ქვეყნის პასპორტი საქართველოს ელექტრონული ვიზის მიღებისას, მაშინ ჩვენ დაგეხმარებით მის გარკვევაში. ელექტრონული ვიზის მისაღებად წარდგენილი სამგზავრო დოკუმენტი უნდა აკმაყოფილებდეს შემდეგ კრიტერიუმებს: სამგზავრო დოკუმენტის მოქმედების ვადა უნდა აღემატებოდეს ვიზის მოქმედების ვადას არანაკლებ სამი თვით; უნდა შეიცავდეს ვიზის ბლანკის დასატანად ვარგის, არანაკლებ, ორ თავისუფალ გვერდს, გარდა e-VISA PORTAL-ის მეშვეობით სამგზავრო დოკუმენტისა; მნიშვნელოვანია, რომ არ უნდა იყოს დაზიანებული და არ უნდა შეიცავდეს არაოფიციალურ ჩანაწერებს. E-VISA PORTAL-ის მეშვეობით წარდგენილი სამგზავრო დოკუმენტის შემთხვევაში მოწმდება სამგზავრო დოკუმენტის პერსონალურ მონაცემთა გვერდი; და ბოლოს, გაცემული უნდა იყოს წინა 10 წლის განმავლობაში.
თუ სურვილი გაქვთ, რომ აქართველოს პასპორტი აიღოთ ფოსტის საშუალებით ისე, რომ არ მიხვიდეთ საზღვარგარეთის ნებისმიერ ქვეყანაში საქართველოს საკონსულოში, მაშინ თქვენ უნდა მიბრძანდეთ საკონსულო სამსახურში თქვენი ბიომეტრიული მონაცემების (ფოტოსურათი, თითის ანაბეჭდები და ხელმოწერა) აღების მიზნით. ბიომეტრიული მონაცემების წარმოდგენა არ არის საჭირო, თუ თქვენ მანამდე უკვე აღებული გაქვთ ბიომეტრიული მონაცემების შემცველობის საქართველოს მოქალაქის პასპორტი და ტექნიკურად შესაძლებელია ამ მონაცემების ხელმეორედ გამოყენება. ამ შემთხვევაში, თქვენ შეგიძლიათ მომსახურება მიიღოთ ფოსტის მეშვეობით.
რაც შეეხება არასრულწლოვნის ქვეყნის დატოვებას უნდა იცოდეთ, რომ 16 წლამდე ბავშვის საქართველოდან დროებითი გასვლა შესაძლებელია მისი ერთ-ერთი კანონიერი წარმომადგენლის (მშობლის) ნებართვით და სრულწლოვანი ქმედუნარიანი პირის თანხლებით.
16-დან 18 წლამდე არასრულწლოვანის, თუ იგი არ იმყოფება რეგისტრირებულ ქორწინებაში, საქართველოდან დროებითი გასვლა შესაძლებელია მისი ერთ-ერთი კანონიერი წარმომადგენლის თანხმობით. -„საქართველოს კანონი საქართველოს მოქალაქეების საქართველოდან გასვლისა და საქართველოში შემოსვლის წესების შესახებ”, მე-8 მუხლი.
დეტალური ინფორმაციისთვის, გთხოვთ, მიმართოთ საქართველოს სასაზღვრო პოლიციას: (+995 32) 2418515.
და ბოლოს, იმ შემთხვევაში, თუ სამგზავრო დოკუმენტს გაუვიდა მოქმედების ვადა და ფლობთ უცხო ქვეყნის მოქმედ ვიზას, მოქმედი ვიზის გამოყენების საკითხი უნდა შეათანხმოთ შესაბამისი ქვეყნის დიპლომატიურ წარმომადგენლობასთან.
