ინტერვიუ ლექსო დუჩიძესთან – “სამშობლოში დაბრუნება ჩემმა 12 წლის შვილმა გადამაწყვეტინა, ესპანეთში გაიზარდა, მაგრამ საქართველო უზომოდ შეუყვარდა”
ავტორი: თათია გოჩაძე
Sheniemigranti.ge გთავაზობთ ინტერვიუს ლექსო დუჩიძესთან, რომელიც მრავალწლიანი ემიგრაციიდან სამშობლოში სულ ცოტა ხნის წინ დაბრუნდა. ლექსო 15 წელი ესპანეთში ცხოვრობდა და მისი სალონი იქ საუკეთესო ათეულში შედის, თუმცა როგორც თავად ამბობს, საქართველოში წამოსვლის გადაწყვეტილება 10 წუთში მიიღო და ამის მიზეზი მისი ქალიშვილი, 12 წლის ეთუნაა…
ჩემთვის, როგორც ერთი ქართველისთვის, ძალიან ემოციური და ამაღელვებელი აღმოჩნდა ისტორია, რომელსაც ინტერვიუში მოისმენთ – ესპანეთში გაზრდილ გოგონას საკუთარი სამშობლო, საქართველო ისე შეუყვარდა, რომ მშობლებს დაბრუნების გადაწყვეტილება მიაღებინა… ✨️🌸
– ლექსო, გვიამბეთ, თქვენი ემიგრანტული გზის შესახებ, როდის დაიწყო – რატომ გადაწყვიტეთ საქართველოდან წასვლა?
-სანამ ესპანეთში გადავიდოდი, გერმანიაში ვსწავლობდი. ცოტა ხნის შემდეგ ჩამოვედი საქართველოში და დავიწყე საკუთარი პროფესიით მუშაობა, თუმცა რაღაც დონეზე სალონური საქმე ნასწავლი მქონდა, როგორც მოგეხსენებათ, ევროპაში სტუდენტებს უწევთ მუშაობა.
ამ სფეროში მყავდა ახლობელი, რომელმაც შემომთავაზა სამსახური და დავთანხმდი. თავიდან ეს ყველაფერი არასერიოზულად მიმაჩნდა, მაგრამ წლების შემდეგ დავრწმუნდი, რომ ამის ნიჭი აღმომაჩნდა. ამ სფეროში სხვა თავისუფლება გაქვს, სწორედ ამიტომ უკვე 15 წელია, ამ საქმით ვარ დაკავებული.
ახლა საქართველოში ვარ. 2 კვირაა, რაც ჩამოვედი და წასვლას აღარ ვგეგმავ.
–საინტერესოა, რამ გადაგაწყვეტინათ ჩამოსვლა?
-ჩემმა შვილმა… ის არის ყველაზე მნიშვნელოვანი, რის გამოც გადავწყვიტე ჩამოსვლა. საქართველოში მხოლოდ ერთხელ მყავდა საახალწლოდ ჩამოყვანილი და ისეთი ემოციებით დატვირთული დაბრუნდა, რომ სულ მთხოვდა საქართველოში დაბრუნებას და ცხოვრებას. განიცდიდა იმას, რომ ასეთი ლამაზი ქვეყანა გვაქვს და ჩვენ ვცხოვრობთ სხვაგანო. ამის გამო მივიღე ეს გადაწყვეტილება. ახლა 12 წლისაა და უბედნიერესია, მოუთმენლად ელოდება სასწავლო წლის დასრულებას, რომ ჩამოვიდეს.
ყოველდღე მირეკავს და დღეებს ითვლის. თუმცა მანამდე არ ჰქონია რაიმე პრობლემა, რომ ესპანეთი არ მოსწონებოდა და ძალიან უყვარს, რადგან ის სწორედ ესპანეთში გაიზარდა. ამიტომ ცოტა გასაკვირია, ასე ძალიან რომ მოინდომა საქართველოში ცხოვრება, თუმცა ეს ძალიან მახარებს…
–როდესაც ემიგრაციიდან ბრუნდები, ალბათ, გათვალისწინებულიც უნდა გქონდეს, აქ რამდენად შეძლებ დასაქმებას… თქვენ შემთხვევაშიც ასე მოხდა?
-რა თქმა უნდა, მე აქ მყავს ჩემი მომხმარებლები. როდესაც შვებულების დროს ჩამოვდიოდი, ვემსახურებოდი მათ. არც შრომის მეშინია, ძალიან მარტივად შემიძლია დავიწყო ნულიდან. ჩემთვის მთავარია, ჩემი გადაწყვეტილებით ჩემმა შვილმა იგრძნოს თავი ბედნიერად.
შეიძლება თავიდან რამდენიმე თვე ისე არ ვიყო, როგორც ესპანეთში, მაგრამ შეუძლებელი არაფერია.
– ლექსო, როგორც ქართველს, ძალიან მიხარია, რომ სამშობლოს დაუბრუნდით…! იქნებ, ერთი-ორი სიტყვით გვიამბოთ ემიგრანტულ ცხოვრებაზე, როგორია ესპანეთში ცხოვრების დონე სხვადასხვა სფეროში, მაგალითად: განათლების, ჯანდაცვის და ა.შ.
-ჯანდაცვის სფერო შედარებით უკეთესია, მაგრამ ვერ ვიტყვი, რომ იდეალურია. ესპანეთში სამედიცინო დახმარება თუ დაგჭირდა, გიწევს, ტკივილი დღეს გაიყუჩო და ექიმთან ვიზიტზე ხვალ ჩაეწერო. შეიძლება მძიმე პრობლემა გქონდეს, მაგრამ ექიმმა არ ჩათვალოს მნიშვნელოვნად და ვიზიტი დაგინიშნოს ორი თვის შემდეგ. ყოფილა ძალიან მძიმე შემთხვევებიც…
მოკლედ, რასთანაც მე შეხება მქონია, ვერ ვიტყვი, რომ კარგი მდგომარეობაა. რაც გამიგია და რასაც შევსწრებივარ, არ არის იდეალური სიტუაცია. იქ ქართველი ემიგრანტები არიან, რომლებიც შვებულებას ელოდებიან, რომ საქართველოში ჩამოვიდნენ და გამოკვლევები აქ ჩაიტარონ. ურჩევნიათ, გადაიხადონ ფული და აქ გაიკეთონ, ვიდრე იქ უფასოდ და შეიძლება დიაგნოზი ვერც დაგისვან.
იქ რაც დიდ როლს თამაშობს, ეს არის აპარატურა. ფაქტობრივად, ესპანელი ექიმები ესპანეთში არ არიან, ისინი დაბალი შემოსავლის გამო წავიდნენ სხვადასხვა ქვეყანაში – გერმანიაში, იტალიაში, საფრანგეთში და ჩვენ ძირითადად გვემსახურებიან ლათინოამერიკელი ექიმები. როდესაც საავადმყოფოში მიხვალ და მის მეტი არავინ არის, იძულებული ხარ, რომ დათანხმდე.
არც განათლების სისტემაა იდეალური. სხვათაშორის, როდესაც ჩემმა შვილმა მოიძია ინფორმაცია, განათლების მხრივ საქართველოში უკეთესია და შედარებით წინ ვართ პროგრამულად ასაკის გათვალისწინებით.
დაბრუნების ერთ-ერთი მიზეზი ესეც იყო, მაგრამ მთავარი მიზეზი ჩემი შვილის დიდი სურვილი და სიყვარულია საქართველოსადმი. ეს ურთიერთობები, სითბო, სიყვარული, რაც მან აქ მიიღო, ამან უფრო მეტად შეაყვარა საქართველო. შოკოლადები, რომლებიც ახლა წელს ბავშვებს საჩუქრად ჩამოვუტანე, უჩემოდ არ ჭამეს, გამიყვეს და მიწილადესო. ეს მისთვის წარმოუდგენელი რამ აღმოჩნდა, რადგან ესპანეთში რაც შენია-შენია, რაც სხვისია-სხვისია… გაფრენამდეც სულ მიზეზებს ეძებდა, რომ საქართველოში დავრჩენილიყავით.
– როგორც თქვით, ბავშვი ესპანეთში გაიზარადა და მან თქვენგან და დედისგან მიიღო ის, რაც ძალიან მნიშვნელოვანი და საჭირო იყო – ჩვენი ქვეყნის სიყვარული. უბრალოდ, როგორც ჩანს, ეს ყველაფერი შემდეგ აქ თვალნათლივ ნახა და მისთვის უკვე ძალიან მნიშვნელოვანი გახდა…
– როდესაც საქართველოზე ვკითხე, თუ რატომ შეუყვარდა აქაურობა ასე ძალიან, – მიპასუხა: შენ სულ საქართველოზე მესაუბრები სიყვარულით დაბადებიდან და რატომ გაგიკვირდაო?…
მე იქ საკუთარი სალონების ქსელი მაქვს, მთელი ესპანეთის მასშტაბით ჩემი სალონი 10 საუკეთესოში შედის. ვარ აკრედიტებული სტილისტი, კოლორისტი, ძალიან ბევრი ცნობილი კლიენტი მყავდა, მაგრამ სულ რაღაც 10 წუთში მივიღე გადაწყვეტილება.
სულ მალე ჩამოვა ჩემი შვილიც საქართველოში. სასწავლო წლის დასრულებას ველოდებით, რადგან ეს წელი დაკარგულად არ ჩაეთვალოს. თითებზე ითვლის დღეებს, ისე უნდა მალე ჩამოსვლა…
–მადლობა ასეთი პატრიოტი შვილის აღზრდისთვის და მადლობა, რომ ჩვენს სამშობლოს დაუბრუნდით. წარმატებებს გისურვებთ!
