იაპონია სავსეა ბუნებრივი საოცრებებითა და სილამაზით. მიუხედავად იმისა, რომ უმეტესწილად, მთელი ყურადღება ტოკიოსა და კიოტოს ეთმობა, იაპონიის სოფლებშიც არსებობს რამდენიმე განსაცვიფრებელი ადგილი.
სტატიის ამ ნაწილში გაგაცნობთ ჰოკაიდოს ულამაზეს ადგილებს.
ბიეი, ჰოკაიდო
ბიეი განთქმულია ფართო მინდვრებითა და ბორცვებით, რომელიც გამოიყენება მრავალი იაპონური რეკლამისა და სატელევიზიო გადაცემის ფონად; ფერმის მინდვრების ნათელი ფერებით, რომელიც ათასობით ვიზიტორს იზიდავს. ყველაზე თვალწარმტაც ხედებს გვთავაზობს „Patchwork-ის გზა“, „ზერუბუს ბორცვები“ და „შიკისაინოოკა”. ბორცვები სხვადასხვა ფერის კომბინაციით მთელ სიგრძეზე მწკრივად არის წარმოდგენილი, რომლის დათვალიერება შესაძლებელია არა მხოლოდ ფეხით, არამედ ველოსიპედებითა და გოლფის მანქანებითაც. ეს არის ადგილი ჰოკაიდოში, რომელიც აუცილებლად უნდა ნახოთ.
მსგავსი ადგილები ერთი შეხედვით შეიძლება საჯარო სივრცედ მოგეჩვენოთ, თუმცა მათი უმეტესობა ფერმერების კერძო საუთრებაა. აქ მათ მოჰყავთ გოგრა, კარტოფილი, ნესვი, ხორბალი, ლობიო, ტკბილი სიმინდი და პომიდორი.
როგორც კი დატკბებით ულამაზესი ხედებით, შეგიძლიათ გადაინაცვლოთ მაღაზიებში და შეიძინოთ სხვადასხვა პროდუქცია, რომელიც რეალურად ამ მინდორში მოჰყავთ. არ დაგავიწყდეთ გასინჯოთ რბილი ნაყინი ნესვის, ლავანდის და გოგრის სხვადასხვა სეზონური არომატით.
ცისფერი აუზი (Aoiike) კიდევ ერთი აუცილებლად სანახავი ადგილია, განსაკუთრებით ფოტოგრაფებისთვის. აქ ბუნებრივი მინერალები წყალს დამატებით ლურჯ ფერს აძლევს. ხეებისა და ტოტების ანარეკლი კი ჯადოსნურ და შთამბეჭდავ სანახაობას ქმნის.
აკაიგავა, ჰოკაიდო
აკაიგავა ჰოკაიდოს დასავლეთ სანაპიროზე მდებარეობს. იგი მთებით გარშემორტყმული პატარა სოფელია, სადაც 1264 ადამიანი ცხოვრობს.
მათ, ვინც აკაიგავას ზამთარში სტუმრობს, აუცილებლად უნდა ეწვიოს კურორტ კიროროს. ეს არის ბევრისთვის უცნობი, დამალული საგანძური, რომელიც დამწყებ მოთხილამურეებს სთავაზობს კურსებს, ოჯახის თითოეული წევრს სათამაშო მოედნებს და გონდოლით გასეირნებას ულამაზესი პეიზაჟებისკენ.
ცურუი, ჰოკაიდო
ცურუი პატარა სოფელია 2596 მოსახლით. აქ გაზაფხული მაისში იწყება, მაშინ, როცა ალუბლის ხეები იწყებენ ყვავილობას. ახლომდებარე ,,კუშიროს ჭაობი”, რომელიც გადაჭიმულია უზარმაზარ 183 კვადრატულ კილომეტრზე, იცვლის ზამთრის ფერებს და იმოსება ახალ მწვანეში.
კიოგოკუ, ჰოკაიდო
კიოგოკუ არის მთიანი რეგიონი ცნობილი იოტეის მთით, რომელშიც წარმოიქმნება ბუნებრივი ცხელი წყაროს წყალი. მეტრამდე სიმაღლის თოვლი, რომელიც ყოველ ზამთარში გროვდება, შეიწოვება და ათწლეულების შემდეგ ქანების მეშვეობით იფილტრება, სუფთა, გემრიელი წყაროს წყალის სახით. ხალხი ამ ქალაქში ამ წყაროს წყლის დასალევად მოდის, რადგან ითვლება, რომ მას სამკურნალო თვისებები აქვს.
