მედიაჰოლდინგი „შენი“ გთავაზობთ ინტერვიუთა ციკლს საქართველოს ახალგაზრდა ელჩებთან, რადგანაც მიგვაჩნია, რომ ფართო საზოგადოებამ უნდა გაიცნოს ყველა ის ადამიანი, რომელიც ჩვენი ქვეყნის პოპულარიზაციისთვის სახელმწიფოებრივად სასარგელო საქმეს აკეთებს.
ჩვენი რესპონდენტი უნგრეთში საქართველოს ახალგაზრდა ელჩი ნინა ტაბატაძეა და სანამ მასთან საინტერესო ინტერვიუს შემოგთავაზობთ, გაგაცნობთ მოკლე ინფორმაციას ახალგაზრდა ელჩების შესახებ:
ცნობისთვის: საქართველოს საგარეო საქმეთა სამინისტრო, მიგრაციის პოლიტიკის განვითარების საერთაშორისო ცენტრის (ICMPD) მხარდაჭერით, საგრანტო პროგრამას 2018 წლიდან ახორციელებს. პროგრამის მიზანს წარმოადგენს საქართველოს პოპულარიზაცია, ქვეყნის ეროვნული ინტერესების დაცვისკენ მიმართული ქმედებებისა და ღონისძიებების განხორციელება, მათ შორის, საქართველოს ევროპული და ევროატლანტიკური ინტეგრაციის, აგრეთვე დეოკუპაციისა და კონფლიქტის მშვიდობიანი მოგვარების საკითხებზე საერთაშორისო თანამეგობრობის ინფორმირებულობის გაზრდისა და საკითხის საერთაშორისო დღის წესრიგში გააქტიურების ხელშეწყობის თვალსაზრისით, საქართველოს უცხოელ ახალგაზრდა მეგობართა ქსელის შექმნა, ქართული დიასპორის წარმომადგენლებთან ურთიერთობა და კულტურულ-საგანმანათლებლო ღონისძიებების გამართვა.
პროგრამის ფარგლებში, ახალგაზრდა ელჩების შერჩევა ხდება ღია კონკურსის საფუძველზე, საგარეო საქმეთა სამინისტროს მიერ განსაზღვრული 27 ქვეყნიდან: ავსტრიის რესპუბლიკა, კანადა, ამერიკის შეერთებული შტატები, ბელგიის სამეფო, ბულგარეთი, გერმანიის ფედერაციული რესპუბლიკა, დანია, დიდი ბრიტანეთისა და ჩრდილოეთ ირლანდიის გაერთიანებული სამეფო, ესპანეთის სამეფო, ესტონეთი, თურქეთის რესპუბლიკა იაპონია, ირლანდია, ისრაელის სახელმწიფო, იტალიის რესპუბლიკა, ლატვია, ლიეტუვა, ნიდერლანდების სამეფო, პოლონეთის რესპუბლიკა, საბერძნეთის რესპუბლიკა, საფრანგეთის რესპუბლიკა, უკრაინა, უნგრეთი, შვედეთის სამეფო, შვეიცარია, ჩინეთი, ჩეხეთი.
sheniemigrani.ge გთავაზობთ ექსკლუზიურ ინტერვიუს უნგრეთში საქართველოს ახალგაზრდა ელჩთან – ნინა ტაბატაძესთან:
– ნინა, გვიამბეთ თქვენი ემიგრანტული ისტორია. როდის და რატომ წახვედით უნგრეთში, და როგორ მიგიყვანათ პროფესიულმა გზამ საქართველოს ახალგაზრდა ელჩობამდე?
– მე საქართველოდან წამოვედი 2018 წელს, მოხალისეობრივად, იტალიაში. ვმუშაობდი სკოლაში, ეს იყო AIESEC—ის პროგრამა და იტალიელი უმაღლესი სკოლის მოსწავლეებისთვის ვაკეთებდი პრეზენტაციებს, რომლებიც უშუალოდ საქართველოს ეხებოდა. ეს იყო სხვადასხვა პრეზენტაცია საქართველოს კულტურის, კულინარიისა და სხვა ქართული ტრადიციების შესახებ. ასევე, გაეროს მდგრადი განვითარების პროექტებზეც ვაკეთებდი პრეზენტაციებს სკოლის მოსწავლეებისთვის. სამწუხაროდ, შემდეგ დაიწყო COVID-19 პანდემია და მომიწია პოლონეთში წასვლა, ასევე მოხალისეობრივად. ეს იყო ევროკომისიის მიერ დაფინანსებული პროექტი. აქაც მიწევდა საქართველოს წარდგენა, რასაც ნამდვილად სიამაყით ვაკეთებდი.
ვმუშაობდი პოლონეთის სკაუტების ორგანიზაციაში და მათთან ერთად ვახორციელებდი ბანაკებს და სხვადასხვა პროექტს სკაუტებისთვის. ამის შემდეგ გადავწყვიტე, რომ უნგრეთში სტიპენდია მიმეღო – Stipendium Hungaricum – შევავსე განაცხადი და ჩავაბარე საერთაშორისო ურთიერთობებზე. ასე მოვხვდი უნგრეთში Corvinus University of Budapest-ში სრული დაფინანსებით. დაფინანსებას ვიღებდი როგორც უნგრეთის, ასევე საქართველოს მთავრობისგან.
ჩემი პროფესია საერთაშორისო ურთიერთობებია და მინდა, ამ მიმართულებით წავიდე. ასევე ძალიან მიყვარს ადამიანებისთვის სხვადასხვა თემის გაცნობა, პროფესიულადაც და ზოგადადაც. განსაკუთრებით მიყვარს, როდესაც საქართველოს შესახებ ვსაუბრობ და ვაცნობ სხვებს. ვიფიქრე, რომ ეს ჩემს პროფესიად მექცია და გავაკეთე განაცხადი, რომ გავმხდარიყავი ახალგაზრდა ელჩი.
– როდის გახდით ახალგაზრდა ელჩი?
– დადასტურება მარტში მივიღე და ამჟამადაც ელჩი ვარ.
– ნინა, როგორი არის თქვენი საქმიანობა ამ თვალსაზრისით? ვიცი, რომ საგრანტო დაფინანსებაც გაქვთ და შეგიძლიათ ღონისძიებების მოწყობა. ხომ არ დაგიგეგმავთ რაიმე ღონისძიება ან უკვე გამართეთ? როგორი დიასპორაა უნგრეთში? გაქვთ მათთან ურთიერთობა?
– ქართული დიასპორა ძირითადად სტუდენტებისგან შედგება, რადგან Stipendium Hungaricum —ის სტიპენდიის წყალობით ბევრი ქართველი მოდის უნგრეთში. ეს ძალიან კარგი პროგრამაა, უნგრეთის მთავრობის მიერ სსიპ განათლების საერთაშორისო ცენტრთან შეთანხმებული. ყოველწლიურად ბევრი სტუდენტი მოდის როგორც ბაკალავრის, ასევე მაგისტრის და დოქტორანტურის პროგრამებზე. ამ გრანტში შედის სწავლის დაფინანსება, სტიპენდია და თანხა საკვებისთვის. ძალიან მნიშვნელოვანია ამ პროგრამის პოპულარიზაცია, რადგან ბევრმა არ იცის ამის შესახებ. რეგისტრაცია ნოემბერში იწყება და აუცილებელია, როგორც საქართველოს, ასევე უნგრეთის გვერდებზე შესაბამისი ინფორმაცია შეავსონ.
რაც შეეხება ჩვენს პროექტს – “გახდი ახალგაზრდა ელჩი” – ეხება საქართველოს ოკუპაციასა და ევროინტეგრაციას. ამ საკითხებს საერთაშორისო ასპარეზზე წარმოვაჩენთ. არ არის მხოლოდ ემიგრანტებისთვის განკუთვნილი, თუმცა ამასაც ემიგრანტების მონაწილეობით ვაკეთებთ. ბევრი მოხალისეც ერთვება. ყოველწლიურად გვაქვს გამოყოფილი 15 000 ლარი და წლის ბოლომდე უნდა განვახორციელოთ პროექტები, რომლებიც საქართველოს პოპულარიზაციას უწყობს ხელს.
ჩემი პირველი პროექტი საქართველოს საელჩოსთან თანამშრომლობით 5 ოქტომბერს ჩატარდა.
ღონისძიება საქართველოსა და უნგრეთის დიპლომატიურ მეგობრობას ეძღვნება. გაიმართა თბილისის ქუჩაზე, ბუდაპეშტში. ბუდაპეშტში თბილისის ქუჩასთან ერთად, ასევე გვაქვს შოთა რუსთაველის ძეგლიც. წარმოდგენილი იყო ქართული ღვინო, საკვები, ხოლო უნგრეთის მხრიდან — ადგილობრივი კერძები და სასმელები.
ჩემი პირველი ინდივიდუალური ღონისძიება კი 11 ოქტომბერს, ჩემს უნივერსიტეტში ჩატარდება. ეს იქნება დისკუსია მრგვალი მაგიდის ფორმატში, სახელწოდებით „წარსულის აჩრდილები და მომავლის იმედები – საქართველოს მოგზაურობა აღმოსავლეთ ევროპაში“. ღონისძიებაზე სპიკერები იქნებიან თენგიზ ფხალაძე — ჯიპას უნივერსიტეტის ლექტორი საერთაშორისო ურთიერთობების დარგში. იგი პრეზენტაციას გააკეთებს საქართველოს ოკუპაციის შესახებ და ადამს სუჩი — უნგრეთის დიპლომატიური აკადემიიდან პრეზენტაცის მსვლელობისას ის ისაუბრებს გეოპოლიტიკურ კონტექსტზე აღმოსავლეთ ევროპაში. დისკუსიის შემდეგ გაიმართება ნეთვორქინგი, სადაც წარმოდგენილი იქნება ქართული ღვინო და ტრადიციული საკვები.
– წარმატებებს გისურვებთ, ნინა! ძალიან მნიშვნელოვანია, რომ ბევრმა ქართველმა წარმატებას მიაღწიოს. ჩემი ქვეყნისთვის ეს წარმატების მომტანია… რამდენი წელია უნგრეთში ცხოვრობთ და რამდენად ხშირად ჩამოდიხართ საქართველოში?
– ხშირად ჩამოვდივარ, როცა კი თავისუფალი დრო მაქვს. ზაფხულში ორი თვე ვიყავი, მანამდე გაზაფხულის არდადეგებზე, და როგორც კი საშუალება მაქვს, აუცილებლად ჩამოვდივარ.
– რაიმეს თუ დაამატებდით ინტერვიუს ბოლოს ან მიმართავდით ემიგრანტებს?
– ვიტყვი, რომ ჩემთვის ახალგაზრდა ელჩობა ახალი არ არის. 18 წლიდან ვმუშაობდი ამ მიმართულებით, მაგრამ ახლა ოფიციალურად გავხდი ელჩი. ცოტა ვნერვიულობ, რადგან პირველი ოფიციალური ღონისძიებების ჩატარება მიწევს, თუმცა დიდი იმედი მაქვს, რომ ყველაფერი კარგად ჩაივლის. საქართველოს შესახებ ძალიან დიდი დაინტერესებაა ევროპაში და არ აქვს მნიშვნელობა, ოფიციალური სტატუსი გაქვს თუ არა — ყველანი ვართ ჩვენი ქვეყნის ელჩები.
ავტორი: თათია გოჩაძე
მასალის გამოყენების პირობები
