სასტუმროს ფასები ზღვის კურორტებიდან

სასტუმროს ფასები ზღვის კურორტებიდან

უკვე ზაფხულია. ზაფხულში ყველა ადამიანისთვის მნიშვნელოვანია როგორც ფიზიკური, ასევე მენტალური დასვენება, იქნება ეს მარტო, მეგობრებთან თუ ოჯახთან ერთად. შვებულებისა და დასვენების დაგეგმვა არც ისე მარტივია, რადგან ბევრი რამის გათვალისწინება გიწევს. სწორედ ამიტომ, ამ სტატიაში დაგეხმარებით,  გაიგოთ, საშუალოდ რა ფასებთან არის დაკავშირებული საქართველოში დასვენება და სად შეგიძლიათ დაისვენოთ ბიუჯეტურად, დაუვიწყარი დღეების გატარებასთან ერთად.

 ძირითადად, საქართველოში საზაფხულო კურორტებით აჭარა გამოირჩევა. ბათუმი და ქობულეთი, ეს ის ადგილებია, სადაც დასვენებასაც და გართობასაც თანაბრად შეძლებთ. ეს კურორტები ტურისტებისა და დამსვენებლების რაოდენობას არ უჩივიან, ამიტომ ამ კურორტებზე დასვენება არც თუ ისე ბიუჯეტურია. სასტუმროში დასვენება უფრო კომფორტულია, მით უფრო, თუ მასში კვებაც და სხვა თქვენთვის სასურველი მოთხოვნილებებიც არის დაკმაყოფილებული. ბათუმის სამ-ვარსკვლავიან სასტუმროებში დასვენებას 7 დღის განმავლობაში 1000-იდან 1300 ლარამდე შეძლებთ. ამ შემთხვევაში შეგიძლიათ ისარგებლოთ სამჯერადი კვებით და ყველა იმ შესაძლებლობით, რაც შეიძლება სასტუმროში ყოფნის დროს დაგჭირდეთ. ბინის ფასები ძირითადად განპირობებულია მისი ადგილმდებარეობით, რამდენოთახიანი გინდათ, რამდენი ხნით. ასევე ფასი განსაზღვრულია ხედის მიხედვით, რამდენად სწრაფად შეგიძლიათ ისარგებლოთ ყველა იმ ობიექტით, რომელიც გჭირდებათ, არის თუ არა ბინა ზღვასთან ახლოს და ა.შ. ბათუმში საოჯახო სასტუმროებშიც შეგიძლიათ დასვენება, რომელიც შედარებით ბიუჯეტურია. ამ შემთხვევაში დასვენებას 7 დღის განმავლობაში 600-იდან 800 ლარამდე შეძლებთ. ამასთან ერთად სანამ დასვენებას დაგეგმავთ, მნიშვნელოვანია გაითვალისწინოთ ისიც, რომ ხარჯის გაწევა გიწევთ გზისთვის, კვების ობიექტებისთვის და გართობისთვის. ბათუმი გართობის მხრივ მრავალფეროვანი ადგილია, ასევე იგი მორგებულია ყველა გემოვნების დამსვენებლისთვის. ყოველ ჯერზე გარეთ კვება, რა თქმა  უნდა, თანხის ფუჭი ფლანგვაა, ამიტომ უმჯობესია, სახლში მოიმარაგოთ საკვები და გარე კვებაზე ნაკლები ხარჯი გექნებათ. რაც შეეხება ტრანსპორტირებას, შეგიძლიათ ბათუმში მოხვდეთ როგორც მატარებლით, ასევე სამარშრუტო ტაქსით, მინივენით. თბილისიდან მატარებლის ღირებულება 35 ლარია, თუმცა შეღავათი არის 10 წლამდე ბავშვებსა და სტუდენტებზე. სამარშრუტო ტაქსითა და მინივენით მგზავრობა  35-40  ლარია.

ასევე, დასვენებას გირჩევთ ურეკსა და შეკვეთილში. ურეკი ერთ-ერთი პოპულარული ზღვისპირა კურორტია, რომელსაც ბევრი დამსვენებელი სტუმრობს. ლურჯი ზღვა, ქვიშიანი სანაპირო, კეთილმოწყობილი სასტუმროები და მწვანე ბუნება შესანიშნავ გარემოს ქმნის ზღვის მოყვარულებისათვის. ასევე ურეკი მისი სამკურნალო თვისებების მქონე მაგნიტური ქვიშით გამოირჩევა. ზღვის სიღრმეც დიდ მანძილზე მცირეა, რაც განსაკუთრებით ხელსაყრელია ბავშვებთან ერთად დასვენებისთვის. აქ შეგიძლიათ დროის მხიარულად და ფერადოვნად გატარება. ურეკის სასტუმროებში დასვენება კი 5 დღის განმავლობაში 800-900 ლარის ფარგლებში შეგიძლიათ.

რეკლამა

 თუ საზღვარგარეთ გეგმავთ წასვლას, ყველაზე ბიუჯეტური გამოსავალი, ალბათ, ტურებია. ტურები ძირითადად ათი დღის განმავლობაში გრძელდება. მაგ: თურქეთი, იტალია, საბერძნეთი, თუ ამ ადგილების დათვალიერებითა და სტუმრობით ხართ დაინტერესებული, ტურის ღირებულება 3700 ლარია.  ამ მოგზაურობაში შედის კვება, ხელბარგი, სასტუმროში განთავსება, ავიაბილეთები, მაგრამ როდესაც გამგზავრებას გეგმავ, უნდა გაითვალისწინო დამატებითი ხარჯებიც. მუზეუმები, კონცერტის ბილეთები, გიდის მომსახურება და ა.შ. მარტივი გამოსავალია, რომ საკუთარ ქვეყანაში შეგიძლია დაისვენო, თან ბიუჯეტურად და თანაც სასიამოვნო დრო გაატარო.

  მოდი, გავიგოთ, თუ სად აპირებს დასვენებას თბილისის მოსახლეობის ნაწილი:

გიორგი, 37 წლის

-გამარჯობა, სად აპირებთ ზაფხულის გატარებას, დაგეგმილი გაქვთ თუ არა უკვე?

-გამარჯობა, დიახ, ჩემს ოჯახთან ერთად ვაპირებ წავიდე დასასვენებლად აგვისტოს ბოლოს. ჯერ ზუსტად გადაწყვეტილი არ გვაქვს, მაგრამ ვფიქრობთ რომელიმე ზღვისპირა ქალაქს და არჩევანს ალბათ ბათუმზე შევაჩერებთ.

რეკლამა

მარი, 20 წლის

– მთელი ზაფხულის განმავლობაში მიწევს მუშაობაც, ამიტომ ჯერ არ ვიცი, შევძლებ თუ არა სადმე წასვლას.

თეა, 39 წლის

–ჩემს მეგობართან ერთად ვგეგმავ პარიზში წასვლას. რაღაც მიზეზების გამო ფრენის გადაწევა მოგვიწია, თუმცა აგვისტოში აუცილებლად წავალთ დასასვენებლად.

ნანა, 24 წლის

-მე თავად ქობულეთში ვცხოვრობ, ამიტომ აუცილებლად ვაპირებ ამ ზაფხულსაც წასვლას და დასვენებას.

ნიკა, 31 წლის

-ძალიან ბევრ ქვეყანაში ვარ ნამყოფი, ამიტომ წელსაც ვფიქრობ, არ გამოვტოვებ ამ შანსს და კიდევ ერთს მივამატებ. ჯერ არ გადამიწყვეტია, მაგრამ აუცილებლად რომელიმე ულამაზეს კუნძულს მოვინახულებ.

სალომე, 19 წლის

-კურსელები ვგეგმავთ, რომ ერთად წავიდეთ დასასვენებლად ამ ზაფხულს და ძალიან გავერთოთ. რამდენიმე დღით ბათუმში ან შეკვეთილში ვფიქრობთ წასვლას.

მარიამი, 42 წლის

-სად აპირებთ დასვენებას ამ ზაფხულს?

-შვილებთან ერთად ორი-სამი დღით აუცილებლად ვგეგმავ დასვენებას, რადგან როგორც მე, ასევე ბავშვებსაც აუცილებლად სჭირდებათ დასვენება.

-როგორ ფიქრობთ ფასებთან დაკავშირებით, რამდენად ძვირია საქართველოში დასვენება?

-არ ვფიქრობ, რომ იაფია, მით უმეტეს, როდესაც ძალიან ტურისტული და ხალხმრავალი ზღვისპირა ქალაქები გვაქვს. მაგრამ იმისთვის ვშრომობ, რომ წელიწადში ერთხელ მაინც ჩემს თავს და ოჯახს ვასიამოვნო.