ეკონომიკის სამინისტროში გასულ წელს ტურიზმში არსებული შედეგებით ამაყობენ. ოფიციალური მონაცემებით, 2023 წელს საქართველოში ტურიზმი პანდემიამდელ მაჩვენებლებთან შედარებით 91.9%-ით აღდგა და ჯამში ქვეყანაში 4 669 469 ტურისტული ვიზიტი შესრულდა. ეკონომიკის მინისტრის მოადგილე მარიამ ქვრივიშვილმა, ტურიზმსა და ავიაციაში გასული წლის შედეგები დღეს გამართულ ღონისძიებაზე წარადგინა და ტურიზმის სფეროში ერთ-ერთ მნიშვნელოვან გამოფენაზე ITB ბერლინი 2023-ზე საქართველოს მასპინძელი ქვეყნის სტატუსით წარდგენაზეც გაამახვილა ყურადღება.
„ტურიზმის ინდუსტრიაში გასული წლის მნიშვნელოვანი მოვლენებიდან ხაზგასასმელია საერთაშორისო ტურისტული გამოფენა ITB ბერლინი 2023, სადაც საქართველო მასპინძელი ქვეყნის სტატუსით ღირსეულად წარდგა მსოფლიოს 180-ზე მეტი ქვეყნის ორასი ათასამდე ვიზიტორის წინაშე. ბერლინის ტურისტულ გამოფენაზე, რომელშიც 80-მდე ქართული კომპანია მონაწილეობდა, საქართველოს სტენდი 1000 კვ.მ.-მდე ტერიტორიაზე იყო განთავსებული. ვფიქრობ, ძალიან ღირსეულად წარმოვადგინეთ ჩვენი ქვეყნის ტურისტული პოტენციალი, კულტურა, გასტრონომია და ამან შეგვიწყო ხელი, რომ თითქმის მილიარდიან აუდიტორიას ერთობლივად გავაცანით ჩვენი ქვეყნის ტურისტული პოტენციალი და შესაძლებლობები. ITB Berlin-მა ხელი შეუწყო კერძო სექტორის დამატებითი კავშირების გაძლიერებას, რასაც საბოლოო ჯამში შედეგის სახით გაზრდილი ტურისტული ნაკადების კუთხით ვხედავთ“, – განაცხადა ეკონომიკის მინისტრის მოადგილე მარიამ ქვრივიშვილმა ღონისძიებაზე, თუმცა იმაზე რა წვლილი შეიტანა ITB Berlin-ის მასშტაბურ ტურისტულ გამოფენაზე საქართველოს ამგვარად წარდგენამ არ დაუკონკრეტებია.
#drpkhakadze #gochadze #sheniemigranti
მასალის გამოყენების პირობები
