გთავაზობთ ინტერვიუს უჩა პირმისაშვილთან, რომელიც პროფესიით ჟურნალისტია – ტელევიზიასა და რადიოში მუშაობის პარალელურად მართავს “ტიკტოკისა” და “ფეისბუქის” ვლოგებს, რომელთა მეშვეობითაც უანგაროდ ეხმარება აუდიტორიას და ასწავლის იმ აპლიკაციების უცნობ ფუნქციებს, რაც შესაძლოა, ყველამ არ იცოდეს…
–უჩა, რატომ აირჩიეთ ბლოგერობა და კონკრეტულად ის მიმდინარეობა, რომლითაც ეხმარებით ადამიანებს/ ასწავლით სხვადასხვა აპლიკაციის მნიშვნელოვან ფუნქციებს?
-წლებია, ჟურნალისტიკურ საქმიანობასთან ერთად, სოციალური მედიის მიმართულებითაც ვმუშაობ. ამიტომ გადავწყვიტე დაგროვილი გამოცდილება საზოგადოებისათვის გამეზიარებინა. თავიდან ეს ბლოგი სატესტო ვერსია იყო, რომ არ დამენახა ჩემი არსებობის საჭიროება სოციალურ ქსელებში, ალბათ აღარ ვიაქტიურებდი. თუმცა, ახლა ბევრ ადამიანს ვეხმარები საჭირო რჩევებით, თანაც, თუ გავითვალისწინებთ თანამედროვე ტექნოლოგიების განვითარების სისწრაფეს, საჭიროა მისთვის ფეხის აწყობა და ცნობიერების ამაღლება.
–თქვენი შემეცნებითი ვიდეოები მსმენელებისთვის საჭირო და გამოსადეგია, ამის მიუხედავად, მაინტერესებს, სალანძღავ კომენტარებს თუ გიწერენ?
-მე ძალიან ყურადღებიანი, თბილი და მოსიყვარულე აუდიტორია მყავს. მიუხედავად იმისა, რომ ე.წ ‘’ჰეითის’’ მოლოდინი მქონდა, იშვიათად რომ ვინმემ უარყოფითი კომენტარი დამიწეროს. ამ დროს ვცდილობ, იგივეთი არ ვუპასუხო და ვკითხო, ამას რატო აკეთებს. გავაგებინო, ავუხსნა რომ ეს არაა კარგი საქციელი. თუ ვერ ხვდება, აღარ ვკარგავ დროს და საუბარიც სრულდება. თანაც, რამდენიმე უარყოფითი კომენტარის ავტორი დღეს ჩემი ერთ-ერთი ყველაზე დიდი გულშემატკივარია. ასეთებიც ხდება, საბედნიეროდ.
–ჩვენი ინფორმაციის წყარო თქვენ ხართ – ვისგანაც ვიგებთ, როგორ გავასწოროთ სხვადასხვა პარამეტრი აპლიკაციებში, თუმცა, მაინტერესებს, თქვენ საიდან დაგიგროვდათ ამდენი ცოდნა?
-საკმაოდ დიდი ყურადღებით ვაკვირდები ყველა სიახლეს ამ სფეროში, რადგან მაინტერესებს. მუდმივად რაღაც ფუნქციას ვტესტავ, რომ გავიგო როგორ მუშაობს და მხოლოდ ამის შემდეგ ვუზიარებ ჩემს გამომწერებს. ბუნებრივია, ხანდახან არის კითხვები, რაზეც პასუხი არ მაქვს, თუმცა ვიძიებ ინფორმაციას და გამომწერებთან ერთად მეც ძალიან ბევრ რამე ვსწავლობ.
–რა დატვირთვა აქვს თქვენთვის თქვენ მიერ შექმნილ “ექაუნთებს” და გადაღებულ ვიდეოებს?
-ზუსტად ვიცი, რომ მათ გარეშე ჩემი ცხოვრება უკვე წარმოუდგენელია. იმ არაერთი საუკეთესო ადამიანის გამო, რომლებიც ჩემს გარშემო გაერთიანდნენ და აფასებენ ჩემს შრომას.
–აპირებთ თუ არა სოციალურ მედიაში უფრო გაფართოებას? რომელ პლატფორმაზე შეიძლება კიდევ ვიხილოთ თქვენი ვიდეოები ტიკტოკისა და ფეისბუქის გარდა?
-ამ ეტაპზე ჩემი ვიდეოები აქტიურად იტვირთება TikTok-სა და Facebook-ზე, თუმცა ვაპირებ, რომ ავითვისო youtube და instagram -იც. საკმაოდ დატვირთული გრაფიკი მაქვს ჩემი სამსახურიდან გამომდინარე, თუმცა პარალელურად ვმუშაობ კონტენტზე, რომელიც სოციალურ ქსელებში შევქმენი. ხანდახან ისიც მიკვირს, ამას როგორ ვასწრებ, როგორ ვახერხებ, თუმცა როდესაც შედეგს ვუყურებ ყველანაირი დაღლილობა მავიწყდება. ყველაზე ბედნიერი მაშინ ვარ, როცა ვიღაც მწერს, რომ ჩემი რჩევები ძალიან გამოადგა. სასიამოვნო პროცესია.
–დაბოლოს, გაქვთ რაიმე მიზანი, რომელსაც გსურთ მიაღწიოთ, როგორც ბლოგერმა?
-ჩემთვის მთავარი ხალხის სიყვარულია, რომელსაც ვგრძნობ და ძალიან ბედნიერი ვარ, სხვა ყველაფერი უმნიშვნელოა.
ავტორი: თამარ ჭანკვეტაძე
