უნიკალური ქართული სივრცე აშშ-ში – ინტერვიუ “ქართულიას” შემქმნელთან
გაინტერესებთ, აშშ-ში შეძლებთ თუ არა ქართული პროდუქტის შეძენას? მაგ: ქართული წიგნი, თიხა, სუვენირი, ხელნაკეთი ნივთები, თექა, ტრადიციული სამოსი, ინსტრუმენტი, მხატვრობა , ტიხრული მინანქარი და სხვა უამრავი რამ…
გთავაზობთ ინტერვიუს ბრენდის მფლობელ ნინო დავლიანიძესთან, რომელმაც აშშ-ში უნიკალური ქართული სივრცე გახსნა:
– პირველ რიგში, გვიამბეთ თქვენ შესახებ – რას საქმიანობთ?
-“ქართულია” – ეს გახლავთ უნიკალური ქართული სივრცე, რომელსაც ანალოგი არ აქვს ევროპასა და ამერიკაში. ჩვენი უპირველესი მიზანია, გავუწიოთ პოპულარიზაცია ყველაფერ ქართულს ამერიკის შეერთებულ შტატებში. ქართული წიგნი, თიხა, სუვენირი, ხელნაკეთი ნივთები, თექა, ტრადიციული სამოსი, ინსტრუმენტი, მხატვრობა , ტიხრული მინანქარი და ბოლოს, ქართველი თანამედროვე დიზაინერების ნამუშევრები უკვე მარტივად ხელმისაწვდომია ამერიკის ნებისმიერ შტატში მცხოვრები ემიგრანტებისთვისაც , რაც, ვფიქრობთ,ძალიან მნიშვნელოვანია.
– როდის და რატომ დაიწყეთ ეს საქმიანობა?
– “ქართულიას” იდეა ერთმნიშვნელოვნად დაკავშირებულია ჩვენი თავდაპირველი საქმიანობის წამოწყებასთან ამერიკაში. ეს გახლავთ ქართული სამზარეულო ბრუკლინში–“Little Georgia”, რომლის შესახებაც სულ ახლახან საკმაოდ ვრცელი სტატია გამოაქვეყნა „ნიუ იორკ თაიმსმა.“ სწორედ აქ დაიწყო ეს ყველაფერი. სახელიდან გამომდინარე, აქ შემოსული ჩვენი მომხმარებლისთვის გვინდოდა, ნამდვილი ქართული გარემო შეგვექმნა და ტრადიციულ კერძებთან ერთად, მცირე რაოდენობით სუვენირი, თიხა, ყანწი და წიგნიც გვქონოდა წარმოდგენილი. დაინტერესება და სურვილი იმდენად დიდი აღმოჩნდა , რომ მალევე გადავწყვიტეთ უფრო ფართო და მასშტაბური სახით, ახლა უკვე სხვა ლოკაციაზე, ქართული კერა შეგვექმნა . აქ შემოსულ მომხმარებელს და დამთვალიერებელს შესაძლებლობა აქვს გაეცნოს ქართულ კულტურას და შეიძინოს უმაღლესი ხარისხის პროდუქტი. ერთი სიტყვით, აქ შემოსული ადამიანი თავს იგრძნობს საქართველოში.
– სრულიად უცხო ქვეყანაში წამოიწყეთ ქართული ბიზნესი, რა სირთულეები შეგხვდათ , სანამ ამ საქმიანობას დაიწყებდით?
– რთულია, რა თქმა უნდა, სრულიად უცხო ქვეყანაში თავის დამკვიდრება და წარმატებული ბიზნესის აწყობა, რომელიც, პირველ რიგში, დიდი შრომის შედეგია. ჩვენს შემთხვევაში, ჩვენი ოჯახის წევრების გვერდში დგომა, აქ თუ საქართველოში, ძალიან მნიშვნელოვანი იყო. ენის ცოდნა, საგადასახადო სისტემის გაცნობა, ლიცენზიების აღება, საბუთების იურიდიული კუთხით მოგვარება, მაღაზიისთვის ფართის მონახვა და ქირაობა. მოწოდებასთან დაკავშირებული პრობლემების მოგვარება, მოგეხსენებათ, ჩვენთან თითოეული ნივთი საქართველოდან ჩამოდის. ამ ყველაფრის ადგილზე მობილიზება, მომწოდებლებთან ურთიერთობა და დროულად მოწოდება კი უკვე ქართული მხარის, ჩვენი მომწოდებლების და იაკო და ნათია ცინცაძეების დამსახურებაა. აქვე მინდა დავძინო გადამზიდი კომპანიების სრული გვერდში დგომა და, რა თქმა უნდა, ჩვენი ქართველი ემიგრანტი მომხმარებლების თუ ბლოგერების გვერდში დგომა, რომელთაც უდიდესი წვლილი მიუძღვით ჩვენს წარმატებაში.
– რა არის თქვენი მთავარი სათქმელი ამ საქმიანობით?
– ნიუ იორკი გახლავთ შტატი, სადაც, ალბათ, ამერიკაში მცხოვრები ყველაზე მეტი ქართველი ემიგრანტია თავმოყრილი და ემიგრაციაში მყოფ ხალხში დაგროვილმა სურვილმა და მონატრებამ, ჰქონოდა შეხება თავის კულტურასთან ამერიკაში , აგრეთვე ჩვენმა სურვილმა, შეგვექმნა პლატფორმა, სადაც ქართველ ნიჭიერ მეწარმეებს ექნებოდათ საშუალება წარმოეჩინათ თავიანთი პროდუქცია ამერიკისა და შემდგომში უკვე მსოფლიოს მასშტაბით და ასევე სურვილმა, რომ გაგვეწია ქართული კულტურისთვის პოპულარიზაცია, ვინაიდან საქართველო მსოფლიოში ძირითადად წარმოდგენილია თავისი მრავალფეროვანი სამზარეულოთი , არადა, რამხელა სიმდიდრე გვაქვს ჩვენი კულტურის სახით, ამ ყველაფერმა ჩვენში დაბადა იდეა, შეგვექმნა სივრცე, სადაც ეს ყველაფერი შესაძლებელი გახდებოდა.
– გაქვთ თუ არა გეგმები სამომავლოდ?
– ჩვენ მაქსიმალურად ვცდილობთ, გავითვალისწინოთ მომხმარებელთა მოთხოვნები და ვცდილობთ, მათ ყოველდღიურად შევთავაზოთ სიახლეები. იქიდან გამომდინარე, რომ ვართ პირველი ქართული წიგნების მაღაზია, ხშირადვაწყობთ ხოლმე წიგნის პრეზენტაციას, ვგეგმავთ საბავშვო წიგნის კითხვის დღეების მოწყობას, მაღაზიას უკვე სტუმრობდნენ თამუნა აბულაძე “wine diamond”– ის დამფუძნებელი, რომელმაც მოაწყო თავისი ბრენდის პრეზენტაცია, აგრეთვე მაღაზიას ესტუმრნენ სულ ახლახან ქართველი დიზაინერები თავიანთი უახლესი კოლექციის ჩვენებით და სამომავლოდაც ბევრი სხვა სიახლე და აქტივობები გვაქვს დაგეგმილი. დაგეგმილია აგრეთვე ჩვენი მეშვეობით უფრო ფართო მასშტაბური პლატფორმის შექმნა ქართველი ნიჭიერი მეწარმეებისთვის თუ დამწყები სტუდენტებისთვის, რათა ჩვენი მაღაზიის მეშვეობით ჰქონდეთ საშუალება, წარმოადგინონ თავიანთი ნაწარმი ამერიკის შეერთებულ შტატებში. ასევე იგეგმება არა მარტო ამერიკის, არამედ მსოფლიოს ყველა წერტილში ქართველი ემიგრანტებისთვის ჩვენი ონლაინ მაღაზიის მეშვეობით ნებისმიერი ნივთის მიწოდება მაქსიმუმ 3-იდან 5 დღეში, რაც, ვფიქრობთ, ძალიან მნიშვნელოვანი საქმეა. აგრეთვე ვგეგმავთ სხვადასხვა გამოფენებზე თუ საღამოებზე მონაწილეობის მიღებას. რა თქმა უნდა, სხვა ლოკაციებზე გაფართოებას და უფრო ფართო მასშტაბით ჩვენი კულტურის წარმოჩინებას.
– გვესაუბრეთ, როგორი გამოხმაურება აქვს ქართულ პროდუქტს უცხოეთში?
– დღეისათვის ძირითადი მომხმარებელი ამერიკაში მცხოვრები ქართველები არიან , მაგრამ ყოველდღიურად იზრდება დაინტერესება ამერიკელი თუ სხვა ეროვნების მომხმარებლისგან. მათი მხრიდან განსაკუთრებით ინტერესს იწვევს ქართული თიხა, ეროვნული სამოსი, სამკაული და ქართველი დიზაინერების კუთხე. თუმცა გვყავს მომხმარებელიც, მაგალითად, ჩინელი, რომელიც გამართულად საუბრობს ქართულად და მეტსაც გეტყვით, ქართული წიგნის აქტიური მკითხველია. ამასწინათ „ვეფხისტყაოსანი“ შეიძინა. ასევე, ეროვნებით ოსმა გოგომ და ებრაელმა ბიჭმა იქორწინეს და გვთხოვეს საქორწინოდ ეროვნული ქართული ჩოხის შეკერვა ბიჭისთვის. ხშირია სვანური ქუდის მოთხოვნა. გვყავს ეროვნებით ებრაელი მომხმარებელი. გვყავს ამერიკელები, რომლებსაც ფანდურის დაუფლებისსურვილი გაუჩნდათ და ჩვენთან შეიძინეს.
– რა შეცვალა თქვენს ცხოვრებაში ამ საქმიანობამ?
– ჩვენ უდიდესი პასუხისმგებლობით ვეკიდებით თითოეულ შეკვეთას. ვიგრძენით ის, რომ ნამდვილად დროული იყო ასეთი პლატფორმის შექმნა, ხოლო, მართლაც დიდი ინტერესი და მოთხოვნა არა მარტო ქართველი, არამედ უცხოელი მომხმარებლების მხრიდან ნდობა, მოწონება და სიყვარული, კი იმაზე მიგვითითებს, რომ წინ კიდევ ძალიან ბევრი საინტერესო პროექტი იქნება.
ავტორი: ლიზი გრიგოლავა
