ევროკავშირის/შენგენის ტერიტორიაზე შესვლისას, როგორც უვიზო მიმოსვლის, ასევე სავიზო
რეჟიმის პირობებში, ნებისმიერი მოქალაქე გადის სასაზღვრო კონტროლს, რომლის შედეგად
მიიღება საბოლოო გადაწყვეტილება შესაბამის ქვეყანაში მისი შესვლის თაობაზე. გამომდინარე
აქედან, რეკომენდებულია თან იქონიოთ ყველა საჭირო დოკუმენტი, რომელიც დაადასტურებს
თქვენი მგზავრობის მიზანს.
საბერძნეთის რესპუბლიკაში (და ზოგადად, ევროკავშირის/შენგენის წევრი ქვეყნის
ტერიტორიაზე) შესვლისას, სასაზღვრო სამსახურის წარმომადგენლის მოთხოვნის საფუძველზე,
ვალდებული ხართ დაასაბუთოთ მგზავრობის კონკრეტული მიზანი (მაგ: საქმიანი ვიზიტი,
ტურისტული მოგზაურობა, ახლობლების ან ნათესავების მონახულება, მოკლევადიანი სასწავლო
კურსი).
მგზავრობის მიზნის დასადასტურებლად, სასაზღვრო სამსახურის წარმომადგენელს უფლება
აქვს მოგთხოვოთ შემდეგი საბუთები:
• საქართველოს მოქალაქის პასპორტი, რომელსაც უნდა ჰქონდეს საბერძნეთის
რესპუბლიკიდან დაბრუნების მომენტიდან მინიმუმ 3 თვის მოქმედების ვადა;
• დასაბრუნებელი სამგზავრო ბილეთი;
• სასტუმროს მოქმედი ჯავშანი;
• სამოგზაურო დაზღვევა;
• მოგზაურობის ფინანსური უზრუნველყოფის დადასტურება: მაგალითად,
თქვენს მფლობელობაში არსებული ნაღდი ფული, მოქმედი საბანკო ელექტრონული
ბარათი, დაფინანსების შესახებ ცნობა, მასპინძლის საგარანტიო წერილი.
მცირეწლოვან ბავშვთან ერთად მგზავრობის შემთხვევაში ზემოთ მითითებულ დოკუმენტებთან
ერთად საჭირო იქნება ბავშვის დაბადების მოწმობა, რომელიც ნათარგმნი იქნება ბერძნულ ან
ინგლისურ ენაზე. იმ შემთხვევაში თუკი არასრულწლოვანი ბავშვი მიემგზავრება საბერძნეთის
რესპუბლიკაში მხოლოდ ერთ მშობელთან ერთად, ან მშობლების გარეშე, ასევე საჭირო იქნება
შესაბამისი თანხმობა მეორე ან ორივე მშობლისგან, რომელიც ნათარგმნი იქნება ბერძნულ ან
ინგლისურ ენაზე.
კონფერენციებში, სემინარებში, საქმიან შეხვედრებში მონაწილოების მიზნით მგზავრობის
შემთხვევაში, ზემოთ ჩამოთვლილ საბუთებთან ერთად რეკომენდებულია თან იქონიოთ
შესაბამისი მოწვევა/პროგრამა.
ნათესავების, მეგობრების ან ახლობლების მონახულების მიზნით მგზავრობის შემთხვევაში
ზემოჩამოთვლილ დოკუმენტებთან ერთად რეკომენდებულია თან იქონიოთ მასპინძლის
ბინადრობის ნებართვის ასლი და მასპინძლის მიერ მომზადებული მოწვევის წერილი.
სამედიცინო სერვისებით სარგებლობის, მოკლევადიანი სამკურნალო კურსის/ოპერაციის
მიზნით მგზავრობის შემთხვევაში ზემოთჩამოთვლილ საბუთებთან ერთად სასურველია თან
იქონიოთ იმ სამედიცინო დაწესებულების თანხმობა, რომელშიც გეგმავთ მკურნალობას ან/და
საქართველოს სამედიცინო დაწესებულების რეკომენდაცია, ჩაიტაროთ შესაბამისი მკურნალობა
საბერძნეთის რესპუბლიკაში.
გზამკვლევის ავტორი იურისტი, ადვოკატი რევაზ კიკნაძე
წყარო: ქართულ-ბერძნული, კულტურულ-საგანმანათლებლო ცენტრი “პეგასი-მერანი”.
#პეგასიმერანი
#drpkhakadze
#gochadze
#sheniemigranti
