„ცვალებადი ნიშნების“ მეორე სეზონი დაიწყო. სერიალი, რომელიც მცირე დროში ძალიან შეიყვარა მაყურებელმა, და, რომელიც სტუდენტების ცხოვრებაზე, მათ თავგადასავლებსა და პრობლემებზე ღიად გვიყვება.
სერიალის მე-2 სეზონის ახალი სახეა მსახიობი თინა დალაქიშვილი. მას ჟურნალი „ოკეი“ ესაუბრა.
„პროფესიით მსახიობი არ ვარ, დამთავრებული მაქვს სასულიერო აკადემია, ლანდშაფტის დიზაინი. ბუნებით ინტროვერტი ვარ და არ მომწონს საზოგადოების ყურადღების ცენტრში ყოფნა. შეიძლება ეს ძალიან არადამახასიათებელი თვისებაა მსახიობისთვის, მაგრამ მე ხომ არც კი ვარ მსახიობი. კინოდან შემოთავაზებები ბევრია, მაგრამ ზედმიწევნით ვარჩევ, ძალიან, ძალიან უნდა მომეწონოს სცენარი, პროექტი, რომ მუშაობას დავთანხმდე.
როდესაც შევხვდი „ცვალებადი ნიშნების“ პროდიუსერს და ვისაუბრეთ, შემდეგ მივწერე ირაკლი კვირიკაძეს (სერიალის ერთ-ერთი მთავარი მსახიობი), რომ მისი აზრი მომესმინა. ის ისეთი აღფრთოვანებით მელაპარაკა მთელ ჯგუფზე, რეჟისორზე, მსახიობებზე, რომ მივხვდი, უნდა დავთანხმებოდი და, ალბათ, ეს გადაწყვეტილება ყველაზე სწორი იყო, რაც მიმიღია. დღეს უკვე ძალიან მადლიერი და ბედნიერი ვარ, რომ ამ გუნდის წევრი მქვია და საუკეთესო პარტნიორი მყავს ირაკლის სახით, მართლა ოცნების პარტნიორია, რომელიც სულ მეხმარება და გვერდში მიდგას.
სერიალში მე ვასრულებ ელენეს როლს, რომელიც გაუს ლექტორია. ყველა უნივერსიტეტს რომ ჰყავდეს ასეთი ლექტორები, სწავლა გაცილებით სასიამოვნო და სახალისო იქნებოდა. ელენე მაქსიმალურად ცდილობს ყურადღება გაამახვილოს აზროვნებაზე, – თავისუფალ აზროვნებაზე, შემოქმედებით აზროვნებაზე.
ამ როლის მთავარი სათქმელი, ალბათ, ისაა, რომ განათლების სისტემაში აუცილებლადაა საჭირო ცვლილებები, სწავლება უნდა გახდეს უფრო საინტერესო და სასიამოვნო, უნდა შეიცვალოს ის ძველებური მიდგომები, რითიც ჩვენც გვასწავლიდნენ და ახლაც ასწავლიან“, – ამბობს თინა დალაქიშვილი. წყარო
#drpkhakadze #sheniambebi #sheniganatleba #shenihoroskopi
მასალის გამოყენების პირობები
